Turkmaniston «qora bozorida» dollar kursi yangi rekord o‘rnatdi

Turkmanistonda milliy valyutaning AQSh dollariga nisbatan kursi yangi rekord o‘rnatdi. «Alternativnyye novosti Turkmenistana» nashrining Lebap viloyatidagi manbalari xabariga ko‘ra, 4 fevral, yakshanba kuni bozorda bir dollarni 12,6 manatdan sotib olishgan. Valyuta sotuvi bo‘lmagan – bozordagi sarroflar dollar yo‘qligini aytishgan.

Mamlakatda valyutani noqonuniy ayirboshlash bo‘yicha avvalgi rekord 2018 yilning yanvar oyi oxirlarida o‘rnatilgandi, o‘shanda xorijiy valyuta 12 manatdan sotilgan.

Turkmaniston Markaziy bankining rasmiy kursi 2015 yilning boshlarida o‘rnatilgan bo‘lib, 1 dollar uchun 3,5 manatlik darajada qayd qilingan hamda uch yil davomida o‘zgarishsiz qolmoqda.

Turkmanistonda naqd valyutani ayirboshlash bo‘yicha rasmiy taqiq 2016 yilning boshidan joriy etilgan.