Keniyaliklar Britaniya hukumatini sudga berdi

Keniyaning Kericho regionida yashovchi aholi mustamlakachilik davrida choy yetishtiriladigan yerlari egallab olingani uchun kompensatsiya olish niyatida.

Foto: AP

Bir guruh keniyaliklar Britaniya hukumatini Inson huquqlari bo‘yicha Yevropa sudiga berdi.

Keniyaning Kericho regionida yashovchi aholi Buyuk Britaniyadan 200 milliard dollar kompensatsiya undirmoqchi.

Da’vo arizasida aytilishicha, 19 asrda ikki qabila a’zolari o‘z yerlaridan quvg‘in qilingan va bu yerlar choy ishlab chiqaruvchi kompaniyalarga berilgan. Ulardan tortib olingan yerlar hozirda transmilliy korporatsiyalarga tegishli va yiliga millionlab dollar foyda keltirmoqda.

Shu sababli keniyaliklar mustamlakachilik davrida choy yetishtiriladigan yerlari egallab olingani uchun kompensatsiya olish niyatida.

BMT ma’lumotlariga ko‘ra, 1963 yilgacha davom etgan Britaniya mustamlakachiligi davrida Kerichoda yashovchi yarim milliondan ortiq keniyaliklarning huquqlari poymol qilingan.

Keniya choy eksport qilish bo‘yicha dunyodagi yetakchi davlatlardan hisoblanadi.

#Keniya #Britaniya