Zelenskiy bir qator ukrainalik diplomatlarni ishdan oldi

Prezident Zelenskiy Ukrainaning Yaponiya, Xitoy va Sloveniyadagi elchilarini, shuningdek, mamlakatning BMTdagi doimiy vakilini lavozimdan bo‘shatishga oid qarorlarni imzoladi.

Foto: president.gov.ua

Ukraina prezidenti Volodimir Zelenskiy mamlakat diplomatik korpusidagi o‘zgarishlarga oid qarorlarni imzoladi. Hujjatlar mamlakat prezidenti saytida e’lon qilindi.

Qayd etilishicha, Zelenskiy Ukrainaning BMTdagi doimiy vakili Sergey Kislitsani lavozimdan bo‘shatdi. Shuningdek, mamlakatning Yaponiyadagi elchisi Sergey Korsunskiy, Xitoydagi elchi Pavel Ryabikin va 2022 yildan beri Sloveniyadagi elchi sifatida ishlab kelayotgan sobiq mudofaa vaziri Andrey Taran lavozimlaridan olindi.

Bundan tashqari, BMTning Jyeneva bo‘linmasidagi Ukrainaning doimiy vakili Yevgeniy Flipenko ishdan olindi. Uning o‘rniga Yevgeniy Tsimbalyuk tayinlandi. Shuningdek, Ukraina tashqi ishlar vazirining sobiq o‘rinbosari Emine Japarovani mamlakatning Venadagi xalqaro tashkilotlar vakili etib tayinlashga oid hali kuchga kirmagan hujjat bekor qilindi.

Ukrainaning Sloveniya, Vengriya, Kongo, Filippindagi yangi elchilari tayinlandi, shu bilan birga Ruanda va Litvadagi diplomatik missiyalari rahbarlari o‘zgartirildi. Ukrainaning Indoneziyadagi elchisi ham lavozimdan olindi. Mamlakat TIVning sobiq spikeri — oktyabr oyida tashqi ishlar vaziri o‘rinbosari etib tayinlangan Maryana Betsa Ukrainaning YuNESKO ishlari bo‘yicha Milliy komissiyasi rahbari lavozimiga tayinlandi.

#Ukraina #elchilar #Volodimir Zelenskiy