Buxoroda Cobalt YPX xodimini urib ketdi

Jondor tumanida haydovchi mashinani YPX xodimi ustiga haydagan. Xodim shifoxonaga yotqizilgan, haydovchi hibsga olingan.

Foto: Videodan kadr

Buxoroda haydovchi Cobalt mashinasda YPX xodimini urib yubordi. Holat 28 yanvar kuni Jondor tumani markazida sodir bo‘lgan.

Ijtimoiy tarmoqlarda tarqalgan videoda YPXning ikki nafar xodimi ikkinchi yo‘lakda to‘xtab turgan avtomobil yonida turgani, keyin avtomobil keskin harakat bilan ulardan birining ustiga yurgani, aks etgan.

Kun.uz’ga ma’lum qilinishicha, inspektor qoidani buzib boshqa mashinalarga xalaqit berib turgan Cobalt haydovchisiga noto‘g‘ri to‘xtab turgani uchun jarima yozishini aytgan. 45 yoshli haydovchi esa xodimning qonuniy talabini bajarmasdan mashinasi bilan uni urib yuborib, keyin harakatdagi Matiz’ga borib urilgan.

YPX xodimi tan jarohatlar bilan shifoxonaga yotqizilgan.

O‘zbekiston bosh prokuraturasi matbuot kotibi Hayot Shamsutdinov xabar berishicha, Jinoyat kodeksining 219-moddasi (Hokimiyat vakiliga yoki fuqarolik burchini bajarayotgan shaxsga qarshilik ko‘rsatish) bo‘yicha jinoyat ishi qo‘zg‘atilgan. Gumonlanuvchi hibsga olingan.

#YTH #Buxoro #Jondor tumani