Jurnalist Alisher Ro‘zioxunov 32 yoshida vafot etdi

26 fevral kuni jurnalist Alisher Ro‘zioxunov vafot etdi. Bu haqda marhumning otasi xabar berdi.

Ma’lum bo‘lishicha, jurnalist oxirgi vaqtlarda og‘ir kasallik bilan og‘riyotgandi.

Iqtidorli va qalami o‘tkir jurnalist Alisher Ro‘zioxunov Kun.uz saytida bir necha yil samarali mehnat qilgan. U faoliyati davomida davlat va jamiyat rivoji yo‘lida yuzlab ijodiy materiallar tayyorlagan.

Shuningdek, Alisher Ro‘zioxunov davlat tashkilotlari xodimlarini bir stolga jamlab, «Munozara klubi» kabi katta loyihalar tashkil qilgan edi.

U 2021 yilda «Ijtimoiy-huquqiy media markazi» nodavlat notijorat tashkiloti muharriri sifatida «Kelajak bunyodkori» medali bilan taqdirlangan.

Kun.uz marhumning oila a’zolari va yaqinlariga chuqur ta’ziya va hamdardlik bildiradi.