Toshkent viloyatidagi bog‘cha xodimi bolalarni gimnastika tayoqchasi bilan urdi

Toshkent viloyati Parkent tumanidagi bog‘chada tarbiyachilar bolalarga qo‘pol munosabatda bo‘lgani aniqlandi. Viloyat MMTB holat yuzasidan ma’lumot berdi.

Ma’lum qilinishicha, mazkur holat 6 yanvar kuni tumandagi 19-sonli davlat maktabgacha ta’lim tashkilotida soat 17:00 atrofida sodir bo‘lgan.

Muassasada jismoniy tarbiya yo‘riqchisi vazifasida faoliyat yuritadigan P.A. tarbiyalanuvchilarni gimnastika tayoqchasi bilan turtib, qatorga turishga undagan.

O‘rganishlar davomida tashkilotning tarbiyachisi Sh. M. ham bolalar bilan qo‘pol munosabatda bo‘lgani aniqlangan.

Mazkur holatlar o‘rganilib, muassasaning jismoniy tarbiya yo‘riqchisi hamda tarbiyachi bilan tuzilgan shartnoma Mehnat kodeksiga asosan bekor qilindi.

Bolalar ombudsmani ham holatga munosabat bildirgan. Unga ko‘ra, 28 fevral kuni Parkent tumanidagi bolalar bog‘chasida tarbiyachi A.P. tomonidan tarbiyalanuvchilar Z.R. (2018 yilda tug‘ilgan, qiz bola) va S.M. (2019 yilda tug‘ilgan o‘g‘il bola)larning qulog‘idan tortib, yuz va bosh qismlariga bir necha marotaba urgani videoyozuvda qayd qilingan.

Holat yuzasidan hozirda tergovga qadar tekshiruv olib borilmoqda, voyaga yetmagan bolalarga nisbatan tan jarohati yetkazilgani faktini aniqlash maqsadida sudga oid ekspertiza tayinlangan.