Janubiy Koreya chegarani kesib o‘tgan KXDR askarlariga qarata ogohlantiruvchi o‘t ochdi

Shimoliy Koreyaning 10 nafar askaridan iborat guruh 8 aprel kuni demarkatsiya chizig‘ini qisqa muddatga kesib o‘tdi. Bu haqda Janubiy Koreya Shtab boshliqlari birlashgan qo‘mondonligi xabar berdi.

Qayd etilishicha, bunga javoban Janubiy Koreya harbiy xizmatchilari bir necha marta ogohlantiruvchi o‘q uzgan.

Qo‘mondonlik xabariga ko‘ra, mazkur hodisa mahalliy vaqt bilan soat 17:00 larda sodir bo‘lgan. Ogohlantiruvchi o‘qlardan keyin KXDR harbiylari chegaraning o‘zlariga qarashli qismiga chekingan.

Oxirgi marta bu kabi holat 2024 yil iyunda sodir bo‘lgandi. O‘shanda Janubiy Koreya KXDR harbiylari bir oy ichida uch marta chegarani buzgani haqida xabar bergan. Janubiy Koreya harbiylarining taxminicha, KXDR askarlari chegarani bexosdan kesib o‘tgan.

Janubiy Koreya o‘tgan yilning iyun oyida Shimoliy Koreya bilan chegarada o‘rnatilgan ovoz kuchaytirgichlar orqali eshittirishlar uzatishni qayta boshlagandi. Bu orqali KXDRning chegaradosh hududlari aholisi Shimoliy Koreya senzurasi nazorati ostida bo‘lmagan yangiliklar va boshqa eshittirishlarni eshitishlari mumkin bo‘ladi.