Saida Mirziyoyeva Shayx Zoid nomidagi «Insoniy birodarlik» nufuzli mukofotining xalqaro hakamlar hay’ati tarkibiga kiritildi

Prezident yordamchisi Saida Mirziyoyeva Musulmon donishmandlar kengashi bosh kotibi Muhammad Abdusalom bilan uchrashuv o‘tkazdi.

«Islom dini asosida yotgan umuminsoniy va ma’naviy qadriyatlarni qo‘llab-quvvatlayotgani uchun mazkur nufuzli xalqaro tashkilotga minnatdorlik bildiraman. Prezident Shavkat Mirziyoyev rahnamoligida O‘zbekiston konfessiyalararo totuvlikni, mamlakatimiz faxri bo‘lgan noyob islom merosini targ‘ib etish borasida butun dunyoda haqli ravishda e’tirof etilmoqda», — deb yozadi prezident yordamchisi.

Shuningdek, Saida Mirziyoyeva har yili o‘tkaziladigan Shayx Zoid nomidagi «Insoniy birodarlik» mukofotining hakamlar hay’ati tarkibiga kiritilganimdan benihoya mamnun ekanini bildirdi.

«Faqat birgalikdagi sa’y-harakatlarimiz bilan biz bu dunyoni yanada yaxshiroq qila olamiz», — deya ta’kidlaydi Saida Mirziyoyeva.

Shayx Zoid nomidagi «Insoniy birodarlik» mukofoti — insoniyat taraqqiyotiga katta hissa qo‘shayotgan jismoniy va yuridik shaxslarga beriladigan nufuzli, mustaqil global mukofotdir. U 2019 yil fevral oyida — Rim papasi Fransisk va Al-Azhar universiteti bosh imomi Ahmad Al-Toyib o‘rtasida Abu-Dabida bo‘lib o‘tgan tarixiy uchrashuv sharafiga ta’sis etilgan. Ular o‘shanda insoniy birodarlik to‘g‘risidagi hujjatni imzolagan edi.

2025 yildagi hakamlar hay’ati quyidagilardan iborat:

• Makki Sall — Senegal va Afrika Ittifoqining sobiq prezidenti.
• Xose Luis Rodriges Sapatero — Ispaniyaning sobiq bosh vaziri.
• Jahon savdo tashkiloti bosh direktori — Ngozi Okonjo-Iveala.
• Kardinal Piter Kudvo Appiah Turkson — Pontifik Fanlar akademiyasi va Pontifik Ijtimoiy fanlar akademiyasining maslahatchisi.
• Patrisiya Skotland — Millatlar hamdo‘stligi bosh kotibi.
• Muhammad Abdusalom — «Insoniy birodarlik» mukofoti bosh kotibi.