Hindistonning Jammu aeroportida portlashlar yuz berdi - AFP

Pokiston tomoni Jammu shahrida dron va raketalar uchirdi. Havo hujumidan mudofaa kuchlari 8 ta raketani tutib qolishga muvaffaq bo‘lgan.

Hindistonning Jammu shahridagi aeroportda 8 may kuni kechqurun portlashlar yuz berdi, deb yozmoqda AFP.

Hind harbiylarining ma’lum qilishicha, Pokiston shaharga dron va raketalar uchirgan. Reuters muxbirining so‘zlariga ko‘ra, Jammuda elektr energiyasi ta’minoti o‘chirilgan.

Xavfsizlik xizmati vakillarining qayd etishicha, shahar hududidagi beshta harbiy obekt hujumga uchragan. Ismini oshkor etmagan hind harbiysi Havo hujumidan mudofaa kuchlari Jammuda sakkizta raketani tutib qolganini ma’lum qilgan. Pokiston jami nechta raketa uchirgani noma’lum.

Oldinroq pokistonlik harbiylar Hindiston tomonidan qator hududlar, jumladan, Karachi va Lohur shaharlariga hamda armiya shtab-kvartirasi joylashgan Ravalpindi garnizon shahriga uchirilgan 29 ta dronni urib tushirgan edi.

Hindiston Qurolli kuchlari 7 mayga o‘tar kechasi «Sindur» operatsiyasini boshlab, Pokistondagi «terrorchilik infratuzimalari» obektlariga raketa zarbalarini yo‘llagandi. Pokiston ham bunga javob zarbalarini amalga oshirdi. So‘nggi ma’lumotlarga ko‘ra, Pokistonda 32 kishi, Hindistonda esa 16 fuqaro halok bo‘lgan.

#Pokiston #Kashmir

Aprel oyida Kashmirning Hindiston nazoratidagi qismida sayyohlarga hujum qilinishi ortidan ikki mamlakat munosabatlari keskinlashdi. 7 mayga o‘tar kechasi Nyu Dehli Sindur amaliyotini boshladi.