NYT: Rossiya Zaporijjya AESni o‘z energotizimiga ulashni rejalashtirmoqda

Sun’iy yo‘ldoshdan olingan suratlarga ko‘ra, Rossiya fevral oyi boshidan beri bosib olingan Mariupol va Berdyansk o‘rtasida 80 kilometrdan ortiq elektr uzatish liniyalarini qurgan.

Foto: Andrei Rubsov/dpa/picture alliance

Rossiya Ukrainaning bosib olingan janubi-sharqiy qismida urush boshida egallangan Zaporijjya AESni o‘z energotizimiga ulash mumkin bo‘lgan elektr tarmoqlarini qurmoqda. Bu haqda 27 may, seshanba kuni Greenpeace ekologik tashkiloti hisobotiga tayanib, The New York Times nashri xabar berdi.

Hisobotda e’lon qilingan va nashr tomonidan tasdiqlangan sun’iy yo‘ldosh suratlari shuni ko‘rsatadiki, 2025 yil fevral oyi boshidan beri Rossiya Azov dengizi qirg‘oqlari bo‘ylab bosib olingan Mariupol va Berdyansk o‘rtasida 80 km dan ortiq elektr uzatish liniyalarini qurgan. Greenpeace ma’lumotlariga ko‘ra, qurilishdan maqsad Mariupol hududidagi yirik nimstansiyaga yangi elektr uzatish liniyalarini ulashdan iborat bo‘lib, u o‘z navbatida undan 220 km g‘arbda joylashgan Zaporijjya AESga ulangan.

Greenpeace yadro energetikasi bo‘yicha mutaxassisi Shon Berni NYT'ga bergan intervyusida sun’iy yo‘ldoshdan olingan suratlarni Rossiya prezidenti Vladimir Putinning Zaporijjya AESni qayta ishga tushirish rejalarining birinchi faktik tasdig‘i deb atadi. Uning fikricha, stansiya oxir-oqibat Ukraina sharqidagi bosib olingan hududlar bilan chegaradosh Rostov viloyatining elektr tarmoqlariga ulanishi mumkin.

#Ukraina #Rossiya #Zaporijjya AES