Angrenda ayanchli YTH: ota va uning farzandi halok bo‘ldi

Kun.uz ixtiyoriga kelib tushgan ma’lumotlarga ko‘ra, 27 may kuni Toshkent viloyati Angren shahrida 2 kishining hayotiga zomin bo‘lgan dahshatli avariya yuz berdi.

27 may 20:30 larda Angren shahar «Navbahor» MFY hududida mast haydovchi «Matiz» avtomobilida yo‘lning belgilanmagan joyidan o‘tayotgan piyodalar – ota va uning 2 farzandini urib yuborgan. Haydovchi voqea joyidan qochib ketgan.

Manbaga ko‘ra, YTH oqibatida ota voqea joyida, uning voyaga yetmagan farzandi esa 28 may kuni ertalab shifoxonada vafot etgan. Oilaning yana bir voyaga yetmagan farzandi jarohat olib, shifoxonaga yotqizilgan.

«Oila uchun juda og‘ir vaziyat, hamma qayg‘uda. PPX xodimlari haydovchini ushlagan» deya Kun.uz'ga xabar berdi fojiadan xabardor fuqarolardan biri.

YHXX axborot xizmati Angrenda shunday fojia bo‘lganini Kun.uz'ga tasdiqladi. Lekin hodisaning boshqa tafsilotlarini ochiqlamadi.