Rossiya Kiyev bilan muzokaralar yangi raundining joyi va vaqtini taklif qildi

Rossiya tashqi ishlar vaziri Sergey Lavrov Ukrainaga muzokaralarning ikkinchi raundini 2 iyun kuni Istanbulda o‘tkazishni taklif qildi. 28 may, chorshanba kuni TIV saytida e’lon qilingan bayonotda aytilishicha, Rossiya bu uchrashuvda Kiyevga tinch yo‘l bilan kelishuv shartlari to‘g‘risidagi memorandumni taqdim etishga tayyor, bu «inqiroz sabablarini ishonchli tarzda bartaraf etishning barcha jihatlari bo‘yicha pozitsiyani belgilab beradi».

«V.R.Medinskiy boshchiligidagi delegatsiyamiz ushbu memorandumni Ukraina delegatsiyasiga taqdim etishga va kelasi dushanba, 2 iyun kuni Istanbulda qayta tiklanadigan to‘g‘ridan to‘g‘ri muzokaralarning ikkinchi raundi davomida zarur tushuntirishlarni berishga tayyor», — deyiladi Lavrov bayonotida. U Turkiyaga «mehmondo‘st turk platformasi» taqdim etgani uchun minnatdorchilik bildirdi.

16 may kuni Istanbulda Moskva va Kiyev o‘rtasida so‘nggi uch yil ichida birinchi to‘g‘ridan to‘g‘ri muzokaralar bo‘lib o‘tdi. Rossiya delegatsiyasiga prezident yordamchisi Vladimir Medinskiy, Ukraina delegatsiyasiga esa mudofaa vaziri Rustem Umerov boshchilik qildi. Muzokaralar taxminan ikki soat davom etdi va bir nechta kelishuvlar bilan yakunlandi: «1000 ga 1000» formulasi bo‘yicha harbiy asirlarni almashish, o‘t ochishni to‘xtatish bo‘yicha rejalar taqdimoti va yangi uchrashuv bo‘yicha prinsipial kelishuv.

23-25 ​​may kunlari Rossiya va Ukraina asirlarni almashdi. Birinchi kuni 270 nafar harbiy xizmatchi va 120 nafar fuqaro, ikkinchi kuni 307 nafar harbiy xizmatchi, uchinchi kuni 303 nafar harbiy xizmatchi o‘zaro topshirildi. Bu almashish 2022 yilda harbiy harakatlar boshlanganidan beri eng yirigi bo‘ldi.