O‘zbekistonning yangi tayinlangan elchisi Iordaniya podshohiga ishonch yorliqlarini topshirdi

O‘zbekistonning Iordaniyaga yangi tayinlangan favqulodda va muxtor elchisi Nodirjon Turg‘unov ushbu mamlakat podshohi Abdulloh II bin al-Husaynga ishonch yorliqlarini topshirdi.

Ammon shahridagi Basman qasrida bo‘lib o‘tgan tantanali marosimdan keyingi muloqot avvalida Nodirjon Turg‘unov O‘zbekiston prezidentining Iordaniya podshohiga yo‘llangan salomlarini yetkazdi.

Podshoh Abdulloh II bin al-Husayn O‘zbekiston rahbariga minnatdorlik izhor etib, yangi tayinlangan elchiga muvaffaqiyatlar tiladi hamda ikki qardosh yurtni bog‘lab turuvchi tarixiy rishtalarni yanada mustahkamlash va sifat jihatidan yangi bosqichga olib chiqishga umid bildirdi.

Shuningdek, Iordaniya tomonining elchi faoliyatida mazkur do‘stona aloqalarni yanada mustahkamlash yo‘lida har qanday ko‘mak ko‘rsatilishi ta’kidlandi.

O‘zbekiston va Iordaniya o‘rtasida diplomatik munosabatlar 1993 yil 15 fevralda o‘rnatilgan.

Eslatib o‘tamiz, Nodirjon Turg‘unov 28 may kuni ushbu mamlakat Tashqi ishlar va xorijdagi vatandoshlar bilan ishlash vazirligi bosh kotibi Majid al-Qatarnaga ishonch yorliqlari nusxalarini topshirgandi.