Rossiya elchisi O‘zbekistondagi diplomatik missiyasini yakunlamoqda

RFning O‘zbekistondagi elchisi Oleg Malginov diplomatik faoliyati yakunlanayotgani munosabati bilan Rossiya kuniga bag‘ishlangan tadbirda minnatdorlik so‘zlari bilan chiqish qildi.

U o‘z nutqida Shavkat Mirziyoyev, hukumat, Tashqi ishlar vazirligi, hamkasblari, elchixona jamoasi, turmush o‘rtog‘i va butun O‘zbekiston xalqiga samimiy minnatdorlik bildirdi.

«Men bu yerda ko‘plab do‘stlarimni qoldiryapman, ishonchim komilki, ular bilan hali ko‘p uchrashamiz. O‘z navbatida, Rossiya-O‘zbekiston munosabatlarini rivojlantirishni qo‘llab-quvvatlashda davom etaman», - dedi elchi.

Ma’lumot uchun, Oleg Malginov diplomatiya sohasida 1979 yildan beri faoliyat yuritib keladi. 1979-1983 yillar davomida sobiq ittifoqning Hindistondagi elchixonasida ishlagan. 1993 yilgacha esa avval sobiq ittifoq, keyinchalik esa Rossiya Tashqi ishlar vazirligining Inson huquqlari departamenti rahbari o‘rinbosari lavozimini egallagan.

U 1994-1999 yillarda Rossiyaning BMTdagi va Jyenevadagi boshqa xalqaro tashkilotlardagi doimiy vakolatxonasi yetakchi maslahatchisi, keyinchalik esa Rossiya Tashqi ishlar vazirligining Xalqaro insonparvarlik hamkorligi va inson huquqlari departamenti direktori o‘rinbosari sifatida faoliyat yuritgan.

Diplomat 2003 yildan 2006 yilgacha Rossiyaning Bangladeshdagi elchisi, 2011-2016 yillarda esa Ruminiyadagi elchisi lavozimlarini egallagan.

Oleg Malginov 2021 yilda O‘zbekistonga elchi etib tayinlanishidan oldin Rossiya Tashqi ishlar vazirligining Xorijdagi vatandoshlar bilan aloqalar bo‘limi boshlig‘i bo‘lgan.