Kiyev va London harbiy ishlab chiqarish bo‘yicha hamkorlik haqida e’lon qildi

Ukraina prezidenti Volodimir Zelenskiy va Buyuk Britaniya bosh vaziri Kir Starmer yangi harbiy ishlab chiqarish bo‘yicha hamkorlik to‘g‘risida kelishib oldi. So‘nggi hamkorlik formati 23 iyun, dushanba kuni, Haagada bo‘lib o‘tadigan NATO sammiti oldidan e’lon qilindi, deb xabar bermoqda PA Media va dpa.

«Biz mojaro atrofidagi muammolarni va qo‘llab-quvvatlash uchun yana nima qilishimiz mumkinligini muhokama qildik», dedi Starmer.

«Bugun tushdan keyin Ukraina va Buyuk Britaniya uchun birinchi bo‘lib sanoat mudofaa ishlab chiqarishi bo‘yicha qo‘shma kelishuvni e’lon qilishimizdan juda faxrlanaman — bu biz qo‘shishda davom etishimiz mumkin bo‘lgan hissa nuqtayi nazaridan oldinga ulkan qadam bo‘ladi», dedi Britaniya bosh vaziri.

O‘z navbatida, Zelenskiy kelishuv «har ikki davlatni mustahkamlashiga» ishonch bildirdi. Ukraina yetakchisining qo‘shimcha qilishicha, ukrainalik harbiylarni Buyuk Britaniyada tayyorlash bo‘yicha Interflex dasturi doirasida tajriba almashish juda muhim.

Zelenskiy va Starmer Dauning-strit, 10-uy bog‘ida mashg‘ulot o‘tayotgan ukrainalik harbiylar bilan suhbatlashdi.

«Bu yerda hozir bo‘lgan barcha instruktorlarga Buyuk Britaniya va ushbu treningda ishtirok etayotgan boshqa davlatlar – hozirda 13 ta davlat nomidan katta rahmat aytmoqchiman», dedi Britaniya vazirlar mahkamasi rahbari. «Bu haqiqiy kuch namoyishi, ittifoqchilar o‘rtasidagi birdamlik, shu bilan birga bizning dushmanlarimizga ham haqiqiy xabar», — deya qo‘shimcha qildi u.

Avvalroq Zelenskiyni Vindzor qasrida Buyuk Britaniya qiroli Charlz III kutib olgan edi.

Londonga tashrif NATO yetakchilari Haagada ikki kunlik sammitga yig‘ilishdan bir kun oldin bo‘lib o‘tdi. Ukraina ham unga taklif oldi, biroq Ukraina prezidentining ishtirok etishi hozircha aniq emas.