Toshkentda yigit ginekolog shifokor nomiga soxta profil ochib, ayollarga pulli maslahat berib kelgani aniqlandi

Toshkentda soxta profil orqali o‘zini ginekolog shifokor sifatida tanitib kelgan yigit ma’muriy jazoga tortildi.

Kun.uz tanishgan sud qarorida keltirilishicha, 1996 yilda tug‘ilgan B.Sh. 2025 yil iyun oyi oxirlarida Telegram’da ginekolog shifokor D.Saydumarova nomidan soxta profil ochgan. U bunda shifokorning surati va ismidan foydalangan hamda odamlarga o‘zini D.Saydumarova sifatida tanishtirgan. So‘ngra shu soxta profil orqali bemorlarga noto‘g‘ri maslahatlar berib kelgan.

B.S. sudda aybiga iqrorlik bildirgan. U haqiqatan ham D.Saydumarovaning qadr-qimmatining kamsitilishiga olib keladigan yolg‘on axborot tarqatganini, ayollarga ayol ginekolog sifatida maslahatlar berganini tan olgan. B.S. qilgan qilmishidan pushaymonlik bildirib, suddan yengillik so‘ragan.

Jabrlanuvchi D.Saydumarova esa uning nomidan soxta profil ochgan B.Sh. bemorlarga ginekologiya sohasiga umuman to‘g‘ri kelmaydigan noto‘g‘ri ma’lumotlar tarqatganini, bu uchun pul olganini ma’lum qilgan. B.Sh.ning harakati qadr-qimmatining kamsitilishiga va obro‘sizlantirilishiga olib kelganini aytgan shifokor yigitga nisbatan qonuniy chora ko‘rishni so‘ragan.

Sud qarori bilan B.S. MJtKning 202-2-moddasi 1-qismida nazarda tutilgan huquqbuzarlikni sodir etgan deb topilgan. Unga BHMning 50 baravari, ya’ni 18 mln 750 ming so‘m miqdorida jarima jazosi tayinlangan.