SSV tizimida uch turdagi korrupsion jinoyat ko‘p uchrayapti

Joriy yilning 11 iyul kuni Sog‘liqni saqlash vazirligida Korrupsiyaga qarshi kurashish milliy kengashining sayyor majlisi bo‘lib o‘tdi. Uni Oliy Majlis Senati raisi, Korrupsiyaga qarshi kurashish milliy kengashi raisi Tanzila Norboyeva olib bordi.

2024 yil davomida Sog‘liqni saqlash vazirligi tizimida 500 dan ortiq korrupsiyaga oid jinoyatlar qayd etilgan. Ularning katta qismi mansabni suiiste’mol qilinish, pora olish-berish va davlat mablag‘larini talon-toroj qilish bilan bog‘liq. Shuningdek, davlat xaridlari sohasida ham qator qonun buzilishlari holatlari aniqlangani ta’kidlandi. Hozirgi vaqtda qonunbuzilishi holatlarini bartaraf etish va kelgusida bunday holatlarga yo‘l qo‘ymaslik bo‘yicha zarur choralar ko‘rilmoqda.

Shuningdek, tibbiyot muassasalarida raqamlashtirish jarayonlarining sust ketayotgani, kadrlar tanqisligi, ishga qabul qilishda shaffoflikning yo‘qligi, tibbiy xizmatlar sifatining turli darajada bo‘lishi kabi tizimli muammolarga ham alohida e’tibor qaratildi.

Oliy Majlis Senati raisi o‘z nutqida ta’kidlaganidek, “korrupsiyaga qarshi kurashish faqat jazo choralari bilan cheklanib qolmasligi kerak. Asosiy maqsad – tizimda sezilarli o‘zgarishlarga erishish, fuqarolarning sog‘liqni saqlash tizimiga ishonchini mustahkamlashdir. Buning uchun, birinchi navbatda, ichki nazorat, ochiqlik va hisobdorlikni ta’minlash lozim”.

Majlis yakunida Sog‘liqni saqlash vazirligi va Korrupsiyaga qarshi kurashish agentligi zimmasiga bir hafta muddatda muhokama jarayonida bildirilgan takliflarni umumlashtirgan holda aniq chora-tadbirlar rejasini – “yo‘l xaritasi”ni ishlab chiqib, Milliy kengashga kiritish vazifasi yuklatildi.