Tramp ishi bo‘yicha sobiq prokurorga nisbatan tekshiruv boshlandi

Davlat xizmatchilarining xulq-atvorini nazorat qiluvchi federal agentlik Donald Trampga qarshi jinoiy ishlarga rahbarlik qilgan sobiq maxsus prokuror Jyek Smitga nisbatan tekshiruv boshladi. Surishtiruv Smitni 2024 yilgi prezidentlik saylovlariga ta’sir o‘tkazishga urinishda ayblagan respublikachi senator Tom Kotton tomonidan boshlangan, deb xabar berdi Reuters.

Agentlikka Maxsus ishlar bo‘yicha boshqarma (Office of Special Counsel, OSC) tomonidan tasdiqlanishicha, tekshiruv Smitning federal amaldorlarga o‘z lavozimlaridan siyosiy faoliyat uchun foydalanishni taqiqlovchi "Xetch akti" qonunini buzganligi ehtimoli bilan bog‘liq. OSC davlat xizmatchilarining xulq-atvorini nazorat qiluvchi mustaqil organ, lekin u jinoiy javobgarlikka tortish vakolatiga ega emas.

Adliya vazirligining sobiq maxsus prokurori Jyek Smit Trampga qarshi ikkita ishni yuritgan: biri maxfiy hujjatlarni noqonuniy saqlash va ikkinchisi 2021 yil 6 yanvarda Kapitoliy binosiga bostirib kirishga olib kelgan 2020 yilgi saylov natijalariga e’tiroz bildirishga urinish bo‘yicha. Ikkala ish ham sudgacha yetib bormadi, bir qator apellyatsiyalar va Oliy sudning sobiq prezidentlar daxlsizligi haqidagi qarori tufayli to‘xtatib qo‘yildi.

Donald Trampning saylovdagi g‘alabasidan so‘ng, Smit Adliya vazirligining amaldagi prezidentni jinoiy javobgarlikka tortmaslik siyosatiga ishora qilib, ishni rasman to‘xtatdi, biroq u to‘plagan dalillar Trampni ayblash uchun yetarli bo‘lishi haqida hisobot e’lon qildi.