ЖССТ коронавируснинг иккинчи тўлқини юз бериши мумкинлигидан огоҳлантирди

Бу ҳақда брифингда ЖССТнинг соғлиқни сақлаш соҳасидаги фавқулодда вазиятлар дастури директори Майкл Райан гапириб ўтди.  

Журналистлар ундан коронавирус пандемиясининг “иккинчи тўлқини” юз бериши эҳтимоли ҳали ҳам сақланиб қолаётгани-йўқлиги ҳақида сўрашган.

“Фикримча, ҳаммаси дунёнинг қай қисмида жойлашганингизга боғлиқ бўлади. Ҳозир биз пандемиянинг иккинчи тўлқинида эмасмиз. Агар Жанубий Америка, Африка, Осиё ва бошқа давлатлардаги маълумотларга назар ташласак, биз биринчи тўлқинни бошдан ўтказмоқдамиз. Биз ҳамон касаллик юқорилаётган босқичдамиз”, деб жавоб қилган Райан.

Унинг тушунтиришича, мутахассислар “иккинчи тўлқин” деганда биринчи тўлқинда касалланишлар сони нисбатан паст даражагача қисқариб, бироқ бир неча ойдан кейин у яна ўзини намоён қиладиган вазиятни кўзда тутишади.

Райаннинг айтишича, бундай вазият бир неча ойдан кейин кўплаб давлатлар учун ҳақиқатга айланиши мумкин. Унинг фикрича, коронавирусга чалинишлар сони исталган дақиқада “кескин ошиб кетиши мумкин”.

“Биз тахминларга йўл қўя олмаймиз. Бизда иккинчи тўлқинга тайёрланишга бир неча ой бўлади. Бу тўлқинда касалликнинг иккинчи авж олиши бўлиши мумкин”, деб таъкидлаб ўтган мутахассис.