Tesla акциялари нархи 20 фоизга тушиб кетди

Фото: Reuters

8 сентябрдаги савдолар вақтида Tesla компанияси акциялари 20 фоизга қадрсизлашиб кетди. Бунга эса S&P 500 индекси қўмитасининг компанияни индексга қўшмасликка қарор қилганига бозорнинг муносабати сабаб бўлган.

Tesla индексга қўшилмаслиги 4 сентябрда маълум бўлган. Шундан кейин компания акциялари нархи 8 фоизга тушиб кетган. 7 сентябрда АҚШда Меҳнат куни нишонлангани сабабли биржалар ишламаган. 8 сентябрдаги савдолар ўрталарига келиб компания акциялари нархи бироз ўсган, бироқ аввалги савдоларга нисбатан 15 фоиз арзонроқ сотилган.

Компания акциялари жорий йил бошидан бери 400 фоизга қимматлашганди. Ушбу натижа эвазига Tesla дунёдаги энг қимматбаҳо автомобилсозлик компанияларидан бирига айланган. “Бир томондан, унинг акциялари S&P 500’га киритилмагани учун арзонлашган бўлса, иккинчи томондан, бу компания қийматининг тўғриланишидир”, деб таъкидлаб ўтган NORD/LB немис банки таҳлилчиси Франк Швопе.

#Tesla #акция