Хоразмда поезд уриб юборган аёл вафот этди

Тошкентдан Хоразм вилояти маркази Урганч томон ҳаракатланган йўловчи поезди уриб юбориши оқибатида 43 ёшли аёл вафот этган. Бош прокуратура матбуот хизмати ижтимоий тармоқларда тарқалган бу маълумотни тасдиқлади.

«Аниқланишича, 8 декабрь куни соат 09:25ларда 43 ёшли аёл ўзининг эҳтиётсизлиги туфайли «Истиқлол-Ҳазорасп» йўналишида келаётган йўловчи поезди уриб кетиши оқибатида олган оғир тан жароҳатлари билан воқеа жойида вафот этган.

Ҳолат юзасидан Урганч транспорт прокуратураси томонидан терговга қадар текширув ҳаракатлари олиб борилмоқда», дейилади хабарда.

Транспорт ва туризм объектларида хавфсизликни таъминлаш департаментининг аниқлик киритишича, бу аёл Истиқлол–Ҳазорасп темир йўлининг 354-километри 7-тўсиғида 55-сонли Тошкент–Урганч–Хива йўловчи поезди олдига тўсатдан чиқиб қолгани сабабли уни уриб юборган.

Аёл танасининг бош қисмидан олган жароҳат туфайли воқеа жойида вафот этган.

Олиб борилган суриштирув ишлари давомида аёл Хоразм вилояти Тупроққалъа тумани Охунбобоев маҳалласида яшовчи фуқаро С.Қ. эканлиги аниқланган.