Сув хўжалиги вазирига янги ўринбосар тайинланди

Ўзбекистон президентининг тегишли қарорига мувофиқ, Зокир Ишпулатов сув хўжалиги вазирининг ўринбосари – Сув хўжалиги объектларини эксплуатация қилиш агентлиги директори лавозимига тайинланди. Бу ҳақда Сув хўжалиги вазирлиги матбуот хизмати хабар берди.

Тайинловга қадар у Вазирлар Маҳкамасининг Инвестиция, экспорт, савдо, қишлоқ ва сув хўжалиги масалалари котибияти бош мутахассиси лавозимида фаолият юритган.

Зокир Ишпулатов – 1983 йил 24 июнда Сурхондарё вилояти Термиз туманида туғилган. Маълумоти олий, муҳандис-гидротехник. 2005 йилда Тошкент ирригация ва мелиорация институти бакалавриатини, 2009 йилда мазкур институт магистратурасини тамомлаган. Техника фанлари бўйича фалсафа доктори (PhD) илмий даражасига эга.

Вазирлар Маҳкамаси қарорига асосан вазир ўринбосари – Сув хўжалиги объектларини эксплуатация қилиш агентлиги директори зиммасига вазирлик тизимидаги қуйи ташкилотлар фаолиятини мувофиқлаштириш, тасдиқланган сув олиш лимитлари, графиклари ва тақсимоти асосида сув етказиб берилишини ҳамда сув ресурсларидан самарали фойдаланишни таъминлаш каби вазифаларни амалга ошириш юклатилган.