Apple энг кутилган янги маҳсулотини чиқаришни кечиктирди

Apple компанияси ўзининг 7 дюйм экранли янги HomePod қурилмаси тақдимотини кечиктирди. Сабаби, гаджет сунъий интеллектга асосланган Siri имкониятларига таянади, аввалроқ, унинг тақдимоти ҳам қолдирилган эди.

Bloomberg шарҳловчиси Марк Гурман сўзларига кўра, компания гаджетни ёз охиригача чиқариши тахмин қилинган эди, аммо энди бу амалга ошмайди, чунки барча ҳаракатлар такомиллаштирилган Siri версиясини ишлаб чиқишга қаратилган.

Бу қурилма ҳақида анчадан бери гапирилмоқда: у Amazon Echo Hub каби ўзига хос марказга айланади, унга уйдаги барча ақлли гаджетлар уланади. Қўнғироқ қилиш, видео орқали мулоқот қилиш, браузерга кириш ва мультимедиа контентини ишга тушириш мумкин бўлади. Ташқи томондан, бундай марказ сенсорли экранга эга iPad планшетига ўхшайди.

Гурман аввалроқ HomePod компаниянинг 2025 йилдаги энг муҳим янгилиги бўлишини айтган эди. Энди уни қачон кутиш кераклиги номаълум.

«Ақллироқ» Siri катта эҳтимол билан 2026 йилга, iOS 20 чиқарилгунга қадар қолдирилди. Компаниянинг таъкидлашича, овозли ёрдамчи фойдаланувчилар билан «ҳақиқий одам каби» суҳбатлаша олади ва шу билан бирга ChatGPT, Gemini Live ва бошқа чатботлар билан рақобатлашади.