АҚШ Молия вазирлиги Сурияга қарши санкциялар юмшатилганини эълон қилди

АҚШ Молия вазирлиги 23 май куни Сурияга қарши санкциялар юмшатилганини эълон қилди. Чет эл активларини назорат қилиш идораси (OFAC) Сурия санкцияларидан амалда воз кечиладиган 25-сонли (GL 25) бош лицензияни берди.

GL 25 илгари тақиқланган операцияларга, жумладан, янги инвестициялар, молиявий хизматлар кўрсатиш ва Сурия нефти ва нефть маҳсулотлари билан боғлиқ операцияларга рухсат беради. Санкцияларни юмшатиш «биринчи навбатда Америка» стратегиясининг бир қисми бўлиб, президент Доналд Трампнинг 13 майдаги Сурияга қарши санкцияларни тўлиқ бекор қилиш ҳақидаги эълонига мос келади.

Бунга параллель равишда, АҚШ Давлат департаменти Суриядаги инсон ҳуқуқлари бузилишида иштирок этганлик учун санкцияларни назарда тутувчи «Сезар қонуни»ни юмшатди. Янги механизм, расмийларга кўра, мамлакат иқтисодиётини тиклашни қўллаб-қувватлаш, хусусий капитал оқимини рағбатлантириш ва барқарорликни мустаҳкамлашга ёрдам бериш учун ишлаб чиқилган.

«Президент Трамп ваъда қилганидек, АҚШ Молия вазирлиги ва Давлат департаменти Сурияга сармоя киритишни рағбатлантирувчи рухсатномаларни жорий қилмоқда. Бугунги қадамлар мамлакатни тинчлик ва фаровонлик йўлига олиб чиқишга қаратилган», деди АҚШ молия вазири Скотт Бессент.

Баёнотда, шунингдек, санкцияларнинг енгиллиги террорчи ташкилотларга, ҳарбий жиноятлар содир этганларга, шунингдек, Башар Асад собиқ режимининг асосий иттифоқчилари бўлган Россия, КХДР ва Эронга тааллуқли эмаслиги таъкидланган.

Қўшма Штатлар «Асад режимининг шафқатсизлиги» ўтмишда қолиб кетганини таъкидлаб, ўз халқи ва қўшнилари учун бирлашган, барқарор ва хавфсиз янги Сурияни қуришга чақирди.