Швейцария 71 та Leopard танкининг Германияга сотилишига рухсат берди

Швейцария Иқтисодиёт вазирлиги (EAER) Германияга 71 та Leopard 1 А5 танкини Украинага қайта экспорт қилмаслик шарти билан сотишга рухсат берди. Бу ҳақда конфедерациянинг федерал кенгаши пресс-релизида сўз боради.

Танклар Италияда сақланаётган ва Швейцариянинг RUAG MRO қуролсозлик концерни бўлинмасига тегишли техникалар ҳисобидан етказилади. Умумий ҳисобда компанияда 2016 йили Италия Мудофаа вазирлигидан сотиб олинган 96 та танк мавжуд. 25 та зирҳли машинага эгалик ҳуқуқи ҳозирга қадар баҳсли бўлиб қолмоқда. 2023 йил 28 июнда Швейцария ҳукумати ушбу танкларни Украинага юбориш мақсадида Германияга сотишни тақиқлаган эди.

Шундан кейин RUAG MRO мазкур танкларни сотишга рухсат олиш учун ариза берган. Эҳтимолий харидорлар қаторида Германияда жойлашган компания ҳам бор эди. Шартномада машиналарни Украинага ҳар қандай шароитда бериш истисно қилинган. Натижада Иқтисодиёт вазирлиги RUAG MRO компанияси Италияда жойлашган ўз танкларини Германия компаниясига сотиши учун рухсат шарт эмас деган қарорни чиқарди.

«Томонларнинг танклар, бутловчи қисмлар ва жиҳозларни Украинага топширмаслик бўйича шартномавий кафолатларини инобатга олган ҳолда, режалаштирилган савдо ҳарбий техника етказиб беришга қўйилган эмбарго талабларига зид эмас», — дея аниқлик киритади вазирлик.

2024 йил декабрда Германия Мудофаа вазирлиги 650 миллион евролик ҳарбий ёрдам пакети доирасида Украинага IRIS-T ҳаво ҳужумидан мудофаа тизимлари, дронлар ва Leopard-1 танкларини етказиб беришини эълон қилганди. Bild маълумотларига кўра, Германия Украинада 2,5 минг километргача уча оладиган ракеталар ишлаб чиқаришни молиялаштириши мумкин.