Франциянинг Renault компанияси Украина учун дронлар ишлаб чиқаради

Шу билан бирга, мазкур дронлар «доимий тактик ва тезкор тайёргарликни таъминлаш мақсадида» француз армиясига ҳам тақдим этилади.

Фото: Getty Images

Франциянинг Renault автомобил концерни Украина учун учувчисиз учиш аппаратларини ишлаб чиқаради. Бу ҳақда France Info радиоси ўз манбаларига таяниб хабар берди.

Renault Франциянинг кичик ва ўрта мудофаа корхоналари билан ҳамкорлик қилади, уларнинг ишлаб чиқариш линиялари «фронтдан бир неча ўн ёки юз километр узоқликда» жойлашади. Автоконцерн ўз пресс-релизида ҳукумат Renault билан боғланганини тасдиқлади, аммо «ҳозирги босқичда қарор қабул қилинмаган».

Франциядаги автомобил ишлаб чиқарувчи компания Украина учун дронлар етказиб бериши ҳақида 6 июн куни мамлакат мудофаа вазири Себастен Лекорню маълум қилганди. У буни «барча учун фойдали» шериклик деб атаган, аммо вазир гап қайси автомобилсозлик компанияси ҳақида кетаётганига аниқлик киритмаган.

Лекорнюнинг сўзларига кўра, дронлар украиналиклар учун мўлжалланган бўлади, аммо улар «доимий тактик ва тезкор тайёргарликни таъминлаш мақсадида» француз армиясига ҳам тақдим этилади. Лекорнюнинг қўшимча қилишича, украиналиклар урушда ушбу дронлардан фойдаланиш бўйича ўз фикр-мулоҳазаларини билдириш имкониятига эга бўлади.

#Франция #дрон #Renault