Paramount компанияси Доналд Трампга 16 миллион доллар компенсация тўлайди

Paramount компанияси АҚШ президенти Доналд Трампнинг собиқ вице-президент Камала Ҳаррис интервюси бўйича даъвосини ҳал қилиш учун 16 миллион доллар тўлашга рози бўлди, деб ёзди The New York Times.

Paramount тўлови АҚШ президентининг суд ва юридик хизмат харажатларини ўз ичига олади. Пул Трампнинг бўлажак президентлик кутубхонасига йўналтирилади.

Компания шунингдек, келажакда президентликка номзодлар билан бўладиган «60 дақиқа» суҳбатларининг ёзма стенограммаларини нашр этишга рози бўлди. Бироқ Paramount таъкидлаганидек, Трамп билан келишув узр сўрашни ўз ичига олмайди.

Трамп 2024 йил ноябрида CBS News телеканалига қарши даъво аризаси билан судга мурожаат қилди. Ушбу телеканалга Paramount компанияси эгалик қилади.

Трампнинг таъкидлашича, президентликка демократ номзод Ҳаррис билан суҳбатда Исроил ва Ҳамас ҳақидаги саволга жавобнинг икки варианти кўрсатилган. У телеканални томошабинларни чалғитаётганликда айблади. Дастлаб у зарарни 10 миллиард долларга баҳолаган бўлса, кейинроқ даъво миқдорини икки баравар оширди. Трамп CBS ҳаракатларини «нотўғри талқиндаги янгиликни намойиш этиш» деб атади. Канал бу айбловни рад қилди.

Кўпчилик адвокатлар Трампнинг даъвосини асоссиз деб ҳисоблади. Уларнинг фикрига кўра, CBS охир-оқибат судда ғалаба қозонган бўларди, шу жумладан, канал ҳеч қандай нотўғри хабар бермагани сабабли ва қонун нашриётларга маълумотни қандай тақдим этишни белгилашда кенг ихтиёрийлик бергани туфайли.

Paramount раиси ва назорат пакети эгаси Шари Редстоун компания директорлар кенгашига Трамп билан даъвони ҳал қилиш имкониятини кўриб чиқишни қўллаб-қувватлашини айтган эди.