Ўн биринчиси. Курскда Россиянинг яна бир генерали ҳалок бўлди

Курск областида Россия ҳарбий-денгиз флоти бош қўмондони ўринбосари Михаил Гудков ҳалок бўлди, деб хабар берди Приморе ўлкаси губернатори Олег Кожемяко.

Ўз вақтида Михаил Гудков қўмондонлик қилган 150-бригаданинг базаси айнан Узоқ Шарқдаги ушбу ўлкада жойлашганди ва Кожемяко у билан яқиндан таниш бўлган.

Кожемяконинг сўзларига кўра, Гудков «полкдошлари билан бирга зобитлик бурчини бажариш чоғида» ҳалок бўлган. Губернатор у билан бирга ҳалок бўлганлар қаторида офицер Нариман Шихалиевни ҳам санаб ўтган. Кожемяко Гудков ва қуролдошларининг ўлими тафсилотлари ва бу қачон рўй берганига аниқлик киритмаган.

РФ мудофаа вазирлиги Гудковнинг ўлимини тасдиқлаган. Вазирликка алоқадор «Звезда» каналида берилган хабарда айтилишича, Гудков «2 июл куни Курск областининг чегара ҳудудларидан бирида жанговар вазифаларни бажариш чоғида ҳалок бўлган».

Украинадаги телеграм-каналлар ва нашрлар (хусусан, «РБК-Украина») Гудков «йўқ қилингани» ҳақида ёзган, шу кунларда у ва унинг сафдошлари ўлими ҳақида россиялик пропагандачилар ҳам хабар берганди. Айрим телеграм-каналларга кўра, Гудков бошқа 10 дан ортиқ офицер билан бирга Коренево районида, чегара яқинидаги қўмондонлик пунктига Украина қуролли кучлари томонидан йўлланган зарба қурбони бўлган, аммо бу қачон рўй берганига аниқлик киритилмаган.

Денгиз пиёдаларининг «Тайфун» жамоат ташкилоти томонидан эълон қилинган некрологда айтилишича, Украина қуролли кучлари 2025 йил 2 июл куни 155-денгиз пиёдалари бригадаси қўмондонлик пунктига ракета зарбаси йўллаган. Кореневода олдинги чизиқдаги пунктга тўртта ракета келиб тушиши оқибатида 10 дан ортиқ киши, жумладан, Гудков ва яна бир неча катта офицерлар ҳалок бўлган.

Генерал-майор Михаил Гудков Тинч океани флотининг 155-алоҳида гвардиячи денгиз пиёдалари бригадаси қўмондони эди. Жорий йил 28 мартида Россия президенти Владимир Путин Гудковни Ҳарбий-денгиз флоти бош қўмондони ўринбосари этиб тайинлаганди. «Барча денгиз пиёдалари ўзларини энг яхши тарзда кўрсатаётганига қарамай, барча бўлинмаларни сиз 155-бригадани олиб келган жанговар тайёргарлик ва самарадорлик даражасига етказиш керак», — деганди Путин «Архангелск» атом сув ости крейсери денгизчилари билан мулоқот чоғида.

Украинага босқиннинг илк даврида 155-денгиз пиёдалари бригадаси Киев атрофидаги ҳарбий ҳаракатларда иштирок этган. Кейинроқ бригада Мариупол штурмида ҳам қатнашган. У Курск областининг Суджа шаҳрини қайтариб олиш учун жангларда жиддий йўқотишларга учраганди.

BBC 2023 йил декабрида Украинадаги урушнинг икки йили давомида элита ҳисобланувчи 155-бригадасининг шахсий таркибидан 234 киши ҳалок бўлгани, оғир ярадорлар, қурбонлар ва бедарак йўқолганлар барчаси қўшиб ҳисобланганда йўқотишлар сони 1450 кишидан ошади.

Лекин Путин бригадани энг яхшилардан бири деб атаган: «Мудофаа вазири, бош штаб бошлиғининг фикрича, генерал-майор Гудков эришган ютуқлар қуролли кучларнинг бошқа бўлинмаларига ҳам тарқалиши керак».

2023 йилда генерал Гудков Россия Қаҳрамони унвонини олган. У Россиянинг Украинага босқини бошланганидан буён ҳалок бўлган россиялик ўн биринчи генерал бўлди.

Жорий йил 25 апрелида Москва яқинидаги Балашихада автомобил портлаши оқибатида Бош штабнинг Бош оператив бошқармаси бошлиғи ўринбосари Ярослав Москалик ҳалок бўлганди.

Россиялик тўрт нафар генерал — Андрей Суховецкий, Владимир Фролов, Канамат Боташев ва Роман Кутузов — Россиянинг Украинага кенг кўламли босқинининг дастлабки тўрт ойи мобайнида ҳалок бўлган. Ўшанда кўплаб қўмондонлар тўғридан тўғри тўқнашув чизиғи яқинида турар ва бу билан қарорлар қабул қилишда тезкорликка эришишга ҳаракат қиларди.

Россия генераллари орасидаги янги қурбонлар 2023 йил июндан бошланади — бу украинларнинг қарши ҳужуми билан бир вақтга тўғри келади. Ўшанда июндан ноябр ойигача яна икки генерал ҳалок бўлади — Россия 35-умумқўшин армияси штаби бошлиғи, генерал-майор Сергей Горячев ҳамда Жанубий ҳарбий округ қўмондони ўринбосари, генерал-лейтенант Олег Цоков. Уларнинг иккиси ҳам ракета зарбалари қурбонига айланган.

2023 йил ноябрда эса 14-армия корпуси қўмондони ўринбосари, генерал-майор Владимир Завадский ҳалок бўлади. Хабар қилишларича, у фронт ортидаги позициялардан бирида мина портлаши оқибатида ҳалок бўлган бўлиши мумкин.

Саккизинчи россиялик генерал — Донецкдаги 5-мотоўқчилар бригадаси қўмондони Павел Клименко — 2024 йил ноябрда ҳалок бўлади. Донецкдаги манбаларга кўра, у мотоциклдан йиқилиб, ўлимга олиб келадиган даражада жароҳатланган. Версиялардан бирига кўра, генерал дрон зарбасидан қочишга уринган, бошқасига кўра — маст ҳолатда бўлган.

Ўтган йилнинг 17 декабрида Москвада Радиациявий, кимёвий ва биологик мудофаа қўшинлари бошлиғи, генерал-лейтенант Игор Кириллов ўз уйидан чиқаётганида ўлдирилади. Портловчи қурилма ўрнатилган ва генералнинг уйи олдига қўйилган самокат масофадан туриб портлатилади. Кириллов Россия ҳудудида суиқасд орқали ўлдирилган илк генерал бўлганди. Бу амалиёт учун жавобгарликни Украина хавфсизлик хизмати ўз зиммасига олган.