Россия аэропортларида 400 га яқин рейс бекор қилинди ёки кечиктирилди

Хавфсизлик мақсадида Москва, Санкт-Петербург ва Нижний Новгород аэропортларида чекловлар жорий этилди, деб хабар берди Росавиация. Россия ҳарбийлари мамлакат ҳудудида 50 га яқин дрон уриб туширилганини маълум қилди.

Фото: Росавиация

Россияда 6 июл, якшанба куни камида 393 та рейс бекор қилинди ёки кечиктирилди. Чекловлар Москванинг Шереметево аэропорти, Санкт-Петербургнинг Пулково ва Нижний Новгороднинг Чкалов (Стригино) аэропортларига таъсир кўрсатди. Бундан ташқари, Иваново, Калуга, Псков, Тамбов ва Ярославл аэропортлари вақтинча рейсларга хизмат кўрсатмаган. Россия Транспорт вазирлиги ва Росавиация бу «парвоз хавфсизлигини таъминлаш» мақсадида амалга оширилганини маълум қилди.

Шереметевога келиш ва жўнаш бўйича 171 та рейс бекор қилинган. Яна 56 та рейснинг жўнаши икки соатдан кўпроқ кечиктирилди. Пулковода 90 та рейс бекор қилинди, 37 таси кечиктирилди. Чкалов аэропортида 26 та рейс бекор қилинди ва 13 таси кечиктирилди — Нижний Новгород ҳаво бандаргоҳида чекловлар энг узоқ давом этди, дея таъкидлади Росавиация.

5 июл куни Шереметево, Пулково ва Чкаловда 250 дан ортиқ рейс бекор қилинди, 270 дан ортиқ рейс кечиктирилди. «Коммерсант» газетаси суҳбатлашган экспертларнинг фикрича, Россияда ҳаво қатновининг икки кунлик коллапси авиакомпанияларга 20 миллиард рублга яқин зарар келтириши мумкин.

6 июл куни Россия Мудофаа вазирлиги Россия ҳаво ҳужумидан мудофаа тизимлари Россия Федерациясининг саккизта ҳудуди устидан 48 та дронни уриб туширгани ҳақида маълум қилди. Унга кўра, Калуга вилоятида 13 та, Брянск вилоятида 10 та, Москва вилоятида тўққизта, Белгород вилоятида олтита, Смоленск вилоятида олтита, Ленинград вилоятида иккита, Курск вилояти ва Новгород вилоятида биттадан дрон йўқ қилинган.

#авиарейс #Россия