Путин Трамп билан учрашув учун «жуда мос жой»ни айтди

Россия президенти Владимир Путиннинг айтишича, Бирлашган Араб Амирликлари Доналд Трамп билан бўлажак учрашув учун «жуда мос жой» бўлади.

«Бундай тадбирни ташкил этишда бизга ёрдам беришга тайёр бўлган кўплаб дўстларимиз бор. Дўстларимдан бири БАА президенти. Ўйлайманки, биз буни ҳал қиламиз, лекин бу жуда мос жойлардан бири бўларди», деди Путин Кремлда Россияга келган БАА президенти билан учрашуви чоғида журналистларга.

Путиннинг қўшимча қилишича, умуман олганда, Украина президенти Володимир Зеленский билан учрашишга қарши эмас, бироқ аввал, «бир неча бор айтганидек» «муайян шароитлар яратилиши» керак – бунгача эса «ҳозирча узоқ».

Россия президенти сўзларига кўра, унинг Трамп билан учрашувига «ҳар икки томондан ҳам қизиқиш билдирилган». Унинг ёрдамчиси Юрий Ушаков учрашувни Америка томони таклиф қилганини айтди. Оқ уйнинг таъкидлашича, ташаббус Россия томонидан илгари сурилган.

Бир кун аввал Владимир Путин Кремлда АҚШ президентининг махсус вакили Стивен Уиткоффни қабул қилган бўлса, эртаси куни Россия президенти ёрдамчиси Юрий Ушаков Путин ва Доналд Трампнинг шахсий учрашувига тайёргарлик кўрилаётганини маълум қилди.

Ушаков сўзларига кўра, у «яқин вақт ичида» бўлиб ўтади. Учрашув жойи аллақачон келишилган, бироқ бу ҳақда кейинроқ эълон қилинади.