Xorazm viloyatiga prokuror tayinlandi

U bungacha Farg‘ona viloyati prokurori o‘rinbosari lavozimida ishlagan.

27 fevral kuni Xorazm viloyat sektorlari, huquqni muhofaza qilish idoralari va davlat tashkilotlari rahbarlari ishtirokida yig‘ilish o‘tkazildi. Unda O‘zbekiston Bosh prokurori Nig‘matilla Yo‘ldoshev, Xorazm viloyati hokimi vazifasini bajaruvchi Jo‘rabek Rahimov qatnashdi.

Xorazm viloyati hokimligi matbuot xizmati xabar berishicha, yig‘ilishda Murodxon Musoxonovich Ahmedov Xorazm viloyati prokurori lavozimiga tayinlangani ma’lum qilindi.

O‘zbekiston Respublikasi Bosh prokurori Nig‘matilla Yo‘ldoshev so‘zga chiqib, viloyatda fuqarolarning qonuniy huquq va manfaatlarini himoya qilish, jinoyatchilikka qarshi kurash borasida amalga oshirilgan ishlar xususida to‘xtaldi va galdagi vazifalar belgilab olindi.

Ma’lumot uchun, adliya katta maslahatchisi Murodxon Ahmedov bungacha Farg‘ona viloyati prokurori o‘rinbosari lavozimida ishlab kelayotgandi.

Eslatib o‘tamiz, 2020 yil oktyabridan buyon Xorazm viloyati prokurori lavozimida ishlagan Botir Qudratxo‘jayev 2022 yil noyabrida O‘zbekiston Harbiy prokurori lavozimiga o‘tgandi.

#Xorazm viloyati #prokurori #Murodxon Ahmedov