Somali poytaxtidagi teraktda 32 kishi halok bo‘ldi, o‘nlab odamlar jarohatlandi

Somalining poytaxti Mogadishoda sodir bo‘lgan portlash va otishmada 32 kishi halok bo‘ldi, 63 kishi yaralandi.

«Ash-Shabob» terrorchilari Mogadishodagi Beach View mehmonxonasi va Lido plyajiga hujum qildi, deb xabar berdi poytaxt politsiyasi matbuot xizmati.

Xudkush-terrorchi plyajdagi olomon orasida o‘zini portlatib yuborgan va o‘sha paytda yana bir necha jangari mehmonxonada o‘t ochgan, deya ta’kidladi matbuot xizmati.

Xavfsizlik kuchlari tun bo‘yi jinoyatchilarni ta’qib qildi. Politsiyaning ta’kidlashicha, terakt katta vahima va tartibsizlikni keltirib chiqardi.

Internetda tarqatilgan kadrlar mehmonxona majmuasi hududidagi portlashdan so‘ng o‘lganlarning jasadlari hamma joyda yotganini ko‘rish mumkin. Hujum uchun javobgarlikni «Ash-Shabob» terror tashkiloti o‘z zimmasiga oldi.