Vashingtonda bortida kongressmenlar bo‘lgan ikki samolyot to‘qnashib ketdi

10 aprel kuni Vashingtonda joylashgan Ronald Reygan nomidagi aeroportda American Airlines’ning ikki samolyoti bir-biri bilan to‘qnashib ketdi, deb xabar beradi Reuters.

Ma’lumotlarga ko‘ra, havo kemalaridan birining bortida AQSh Kongressining kamida uch nafar a’zosi bo‘lgan. The Washington Post esa har ikki reysda ham kamida besh nafar kongressmen bo‘lganini yozdi. Xususan, Nyu Yorkdan saylangan demokratlar Gregori Miks va Greys Men, vakillar palatasi a’zolari Jos Gottaymer va respublikachi Nik LaLota.

Hodisa samolyotlarning harakatlanish yo‘lagida sodir bo‘lgan: Bombardier CRJ 900 qanoti bilan Embraer E175ʼga urilgan. Ikkala havo kemasi ham texnik ko‘rikka yuborilgan. Aeroport faoliyatida uzilishlar ro‘y bermagan.

Qayd etilishicha, bu so‘nggi kunlarda AQSh samolyotlari bilan yuz bergan ikkinchi holatdir. 7 aprel kuni Oregonda xususiy samolyot uchish-qo‘nish yo‘lagidan chiqib ketib, suvga qulagan. Hodisa oqibatida besh kishi jarohat olgan.

Shuningdek, 10 aprel kuni Nyu York yaqinidagi Jyersi-Siti shahrida vertolyot Gudzon daryosiga qulashi oqibatida olti kishi — Siemens konsernining Ispaniyadagi filiali rahbari Agustin Eskobar, uning rafiqasi va uch nafar farzandi hamda uchuvchi halok bo‘lgan.