Xitoy Trampni o‘zaro bojlarni bekor qilishga chaqirdi

Xitoy AQSh tomonidan joriy etilgan bojlarning qisman bekor qilinishiga munosabat bildirib, buni «kichik qadam» deb baholadi va prezident Donald Trampni o‘zaro tariflarni to‘liq bekor qilishga chaqirdi. Bu haqda Xitoy Xalq Respublikasi Savdo vazirligi bayonot berdi, deb xabar qilmoqda Amerikaning CNBC telekanali.

«Biz AQShni xalqaro hamjamiyat va ichki aql-idrok ovozlariga quloq tutishga, o‘z xatolarini to‘g‘rilash yo‘lida katta qadam tashlashga, «o‘zaro tariflar» deb nomlangan noqonuniy harakatlarni to‘liq bekor qilishga va o‘zaro hurmatga asoslangan teng huquqli muloqot orqali ziddiyatlarni hal etish yo‘liga qaytishga chaqirmoqdamiz», — deyiladi Xitoy tomoni bayonotida.

Shuningdek, vazirlik juma kuni kechqurun e’lon qilingan ayrim texnologik mahsulotlarga nisbatan bojlardan ozod etish bo‘yicha qarorning ta’sirini baholash bilan shug‘ullanayotganini ma’lum qildi.

Avvalroq AQSh Xitoy bilan savdo munosabatlari borasida vositachilar orqali «yumshoq muloqot» boshlagani xabar qilingan edi.

12 aprel kuni AQSh bojxona va chegara qo‘riqlash xizmati hukumat tomonidan joriy qilingan boj tariflari ta’sir etmaydigan tovarlar ro‘yxatini e’lon qildi. Ular sirasiga smartfonlar, noutbuklar, qattiq disklar, kompyuter protsessorlari, xotira chiplari va yarimo‘tkazgichlarni ishlab chiqarish uchun ishlatiladigan mashinalar kiritilgan.