Nyu-Yorkda musulmon nomzod demokratlar praymerizida g‘alaba qozondi

Nyu-Yorkda Demokratik partiyaning birlamchi saylovida g‘alaba qozongan musulmon nomzod Zohran Mamdaniy shaharni aholining barcha qatlamlari uchun arzon qilish va sinfiy tengsizlikka barham berish niyatida ekanini aytdi. «Men ishchilar sinfi uchun kurashaman. Mening kurashim bu shaharda yashashga qurbi yo‘q bo‘lganlar uchun», — deya ta’kidladi u saylovoldi tashviqoti tadbirlaridan biridagi nutqida.

Mamdaniyga ko‘ra, uning kampaniyasi Qo‘shma Shtatlardagi eng qimmat shahar — Nyu-Yorkni hamma uy-joy sotib olishi va o‘zini xavfsiz his qilishi mumkin bo‘lgan joyga aylantirishga qaratilgan. U shaharning ijtimoiy tuzilishini yo‘q qilishga urinishda ayblagan AQSh prezidenti Donald Tramp ma’muriyatining qarshiligiga qaramay, bu kurashni davom ettirishiga ishontirdi.

Siyosatchi Tramp avvalroq uni deportatsiya qilish bilan tahdid qilganini eslatdi. «Donald Tramp menga hujum qilmoqda, chunki u e’tiborni ishchilarga qarshi urushidan chalg‘itmoqchi. Lekin biz unga imkoniyat bermaymiz», — dedi Mamdaniy.

Unga ko‘ra, Trampning ayblovlari aholi e’tiborini yashash, oziq-ovqat va uy-joy narxining oshishi kabi dolzarb muammolardan chalg‘itishga urinishdir. Uning qo‘shimcha qilishicha, Tramp saylovoldi va’dalarini bajarmagan va nafaqat Nyu-York, balki butun mamlakat bo‘ylab ishchilar sinfi manfaatlariga xiyonat qilgan. Mamdaniyning ta’kidlashicha, haqiqiy yechimlar o‘rniga Tramp sinfiy tengsizlik va ijtimoiy kelishmovchilikni kuchaytirmoqda.

«Bizning nyu-yorkliklar sifatida avtoritarizmga qarshi turish va ishchilar huquqlarini himoya qilish mas’uliyatimizdir», deya qo‘shimcha qildi u.