«Trampning sabri tugamoqda» – Rubio

Uning so‘zlariga ko‘ra, Rossiya bilan muloqotlar «hech qanday natija olib kelmayotganidan» Trampning hafsalasi pir bo‘lgan. 

«Uning [AQSh prezidentining] sabri tugamoqda va Rossiya tomoni bu urushni tugatish uchun biror-bir chora ko‘rishini uzoq kutmoqchi emas», — dedi Rubio.

Amerika yetakchisi iyul o‘rtalarida «Rossiyadan juda norozi» ekanini aytgan va agarda Ukrainadagi urushni to‘xtatish borasida kelishuvga erishilmaydigan bo‘lsa, «100 foizlik» ikkilamchi bojlar kiritish bilan tahdid qilgandi. U buning uchun 50 kun muhlat bergan. Shu bilan birga, Tramp hech kimning tarafida emasligini ta’kidlagandi. 

Rossiya prezidentining matbuot kotibi Oq uyning bu iddaosiga javoban, Trampning bayonoti «ancha keskin uslubga ega» ekanini aytgandi. Peskovning so‘zlariga ko‘ra, Rossiya Qo‘shma Shtatlar bilan muloqotni davom ettirish niyatida hamda Vashington nizoni hal qilish yo‘lidagi harakatlarini davom ettirishiga umid qilmoqda. Kreml Trampning bojlar haqidagi gapini «juda jiddiy» deb atadi va buni tahlil qilishga va’da berdi.