Қозоғистон пойтахтида Нурсултон Назарбоев ҳайкали олиб ташланди

Элбоши номидаги Миллий мудофаа университети номи ҳам ўзгартирилди.

Фото: Ижтимоий тармоқлар

Қозоғистон биринчи президенти Нурсултон Назарбоевнинг 2020 йилда 80 ёшга тўлиши муносабати билан очилган ҳайкали Остона шаҳридаги Миллий мудофаа университети ҳудудидан демонтаж қилинди. Бу ҳақда ижтимоий тармоқларда маълумотлар тарқалди.

Қозоғистон Мудофаа вазирлиги ёдгорликнинг олиб ташланишига изоҳ берди.

«Мудофаа вазирининг буйруғи билан Қозоғистон Республикасининг биринчи президенти «Элбоши номидаги Миллий мудофаа университети» номи «Миллий мудофаа университетига» ўзгартирилди. Шу муносабат билан Миллий мудофаа университети ҳудудида жойлашган ёдгорликни Қозоғистон Қуролли Кучлари Давлат ҳарбий тарихи музейи биносига кўчириш ва ўрнатиш тўғрисида қарор қабул қилинди», дейилади изоҳда.

Айни пайтда ёдгорлик мудофаа бўлими биноларидан бирида вақтинчалик сақланмоқда. Тайёргарлик тадбирларидан сўнг ёдгорлик кейинчалик ўрнатиш учун музей биносига кўчирилади, деб қўшимча қилди вазирлик.

#Нурсултон Назарбоев #Остона #Қозоғистон