Стрелков-Гиркинга колониядан урушга жўнаш бўйича икки марта рад жавоби берилди

Донецкдаги россияпараст айирмачиларнинг собиқ қўмондони Игор Стрелков (Гиркин)га Украинадаги уруш учун колонияни тарк этишга рухсат берилмади. Бу ҳақда унинг рафиқаси Мирослава Регинская 11 сентябр, чоршанба куни Telegram-каналида ёзди.

У Стрелковнинг иккита хатидан олинган маълумотга ишора қилди, улардан бири, Регинская сўзларига кўра, тарафдорига, иккинчиси эса ўзига юборилган. Стрелковга кўра, колонияга келган ҳарбий хизматчиларга фронтга жўнатиш илтимоси билан мурожаат қилган, лекин икки марта ариза бера олмаган. «Бизга полковниклар керак эмас» деган мулоҳаза билан унга рад жавобини беришган, дейди собиқ бўлгинчилар қўмондони.

«Ҳарбий коммисариат вакили мени четлаб ўтяпти»

«Ҳарбий коммисариат вакили мени четлаб ўтяпти», деди Игор Стрелков. SHOT Telegram-канали 6 сентябр куни сепаратистлар собиқ қўмондони гўёки «махсус ҳарбий операцияга» кетаётгани ҳақида хабар берди. Июл ойида Мирослава Регинская Стрелков Россия Федерациясининг Киров вилояти Кирово-Чепецкдаги 5-сонли колонияга ўтказилгани ҳақида ёзган эди.

Россия оммавий ахборот воситаларининг ёзишича, ушбу ахлоқ тузатиш муассасасида собиқ ҳуқуқ-тартибот идоралари ходимлари жазони ўтамоқда. Масалан, «Медуза» мухбири Иван Голуновга гиёҳванд моддалар ташлаб қўйган собиқ полициячи Игор Ляховец ва Росгвардия директорининг собиқ ўринбосари, генерал-лейтенант Сергей Милейко шу ерда сақланмоқда. 

«ФСБ» собиқ ходими ва «ДХР»даги собиқ қўмондон
 
«ФСБ» собиқ зобити Игор Стрелков (Гиркин) 2014 йил апрелидан Украина шарқидаги россияпараст айирмачилар қуролли кучларига қўмондонлик қилган ва ўша йилнинг май ойидан августигача ўзини мустақил деб эълон қилган «ДХР»нинг «мудофаа вазири» бўлиб ишлаган.

2022 йилда Стрелков Россиянинг Украинага қарши кенг кўламли урушини қўллаб-қувватлади, лекин унинг фикрича, етарлича радикал ҳаракат қилмаган Россия Федерацияси раҳбариятини кескин танқид қилди. 2023 йил июл ойида жиноий жавобгарликка тортилишига Стрелковнинг Telegram-каналидаги постлари сабаб бўлган. 2024 йил январ ойи охирида у экстремизмга даъват қилишда айбдор деб топилиб, тўрт йиллик қамоқ жазосига ҳукм қилинди.

Ҳаага суди MH17 иши бўйича Стрелковни умрбод қамоқ жазосига ҳукм қилди 

Аввалроқ Игор Стрелков Нидерландияда сиртдан умрбод қамоқ жазосига ҳукм қилинган эди. Бу қарор 2022 йил ноябрида Ҳаага округ суди томонидан 2014 йилда Донецк вилоятида Россиянинг «Бук» ЗРК томонидан уриб туширилган Malaysia Airlines авиакомпаниясининг «Боинг» самолёти ҳалокати бўйича қабул қилинган. Ушбу ҳодиса натижасида 298 киши ҳалок бўлди.