Тўқаев Қозоғистон БМТни ислоҳ қилиш тарафдори эканини маълум қилди

БМТ Хавфсизлик Кенгаши Германия, Япония, Осиё ва Африка давлатлари ҳисобига кенгайиши керак. Бу ҳақда Қозоғистон президенти Қосим-Жўмарт Тўқаев маълум қилди. Унинг ҳисоблашича, ривожланаётган мамлакатлар ротация асосида органга қўшилиши керак.

«Энг аввало Хавфсизлик Кенгашини кенгайтириш керак. Янги ривожланаётган давлатлар БМТнинг ушбу муҳим органи таркибига, эҳтимол, ротация асосида киритилиши лозим», — дейди Тўқаев.

Қозоғистон етакчисининг сўзларига кўра, «ҳар қандай ҳолатда ҳам Япония, Германия каби йирик державалар, шунингдек, Осиё ва Африка давлатлари вакиллари Хавфсизлик Кенгаши таркибига киритилиши ёки қандайдир усулда унинг фаолиятига жалб этилиши керак».

Қосим-Жўмарт Тўқаевнинг таъкидлашича, Қозоғистон БМТни ислоҳ қилиш тарафдори. Унинг сўзларига кўра, «Қозоғистон каби ўртача державалар асосий халқаро муаммоларни ҳал этиш ва қарор чиқаришда нисбатан муҳим рол ўйнаши лозим».

БМТ Хавфсизлик Кенгаши вето қўйиш ҳуқуқи билан доимий беш аъзога эга: АҚШ, Россия, Франция, Хитой ва Буюк Британия. 2023 йилда АҚШ президенти Жо Байден Хавфсизлик Кенгашини кенгайтириш ташаббусини илгари сурганди. Франция президенти Эммануэл Макрон Германия, Япония, Ҳиндистон ва Бразилия ҳам унинг доимий аъзосига айланиши кераклиги ҳақида гапирган эди. РФ ташқи ишлар вазири Сергей Лавров Япония ва Германия аъзолигига қарши чиқиш қилган. Унинг сўзларига кўра, орган Бразилия, Ҳиндистон ва Африка давлатлари ҳисобига кенгайиши керак.