Париждаги музейдан Макроннинг мумдан ясалган ҳайкали ўғирланди

Париждаги Гревен музейидан Франция президенти Эммануэл Макроннинг мумдан ясалган ҳайкали ўғирлаб кетилди. Акция учун масъулиятни Greenpeace халқаро экологик ташкилоти ўз зиммасига олди.

Қайд этилишича, ўғирлик 2 июн куни соат 10:30 ларда амалга оширилган. Икки аёл ва эркак музейга оддий ташриф буюрувчи сифатида кириб, ҳожатхонада музей ходимлари формасини кийиб олган. Улар Франция президентининг Елисей саройидаги кабинетида тасвирланган ҳайкални захира чиқиш йўли орқали олиб кетган. Ўғрилар қиймати 40 минг еврога етадиган Эммануэл Макроннинг мум ҳайкалини чойшабга ўраган ҳолда олиб чиққан.

Содир бўлган воқеадан кўп ўтмай музейга ўзини Greenpeace фаоли деб таништирган одам қўнғироқ қилиб, ўғриликни у ва ҳамкасблари содир этганини маълум қилган.

Макроннинг ҳайкали Россиянинг Париждаги элчихонаси биноси олдига етказилган. Мум ҳайкал у ерга «Украина ёняпти, бизнес давом этмоқда» ёзуви туширилган баннер билан ўрнатилган. Фаоллар, шунингдек, «Уран», «Газ» ёзувларини ҳам жойлаштирган бўлиб, шу орқали Украина уруши фонида Франция ва Россия ўртасида давом этаётган энергетик ҳамкорликка шама қилган. Гревен музейи зудлик билан полицияни хабардор қилган. Ҳолат юзасидан тергов олиб борилмоқда.