Ўзбекистон ва Покистон ҳудудларида икки мамлакатнинг миллий ресторанлари ташкил этилади

Ўзбекистон элчихонаси ташаббуси билан Тошкент шаҳрида Баҳриддин Чустий ва Покистондаги машҳур Monal Restaurant ресторанлар тармоғи асосчиси Луқмон Али Афзал ўртасида учрашув бўлиб ўтди.

Фото: "Дунё" АА

Унда икки томонлама ҳамкорликни йўлга қўйиш, тажриба алмашиш ва гастрономик йўналишдаги қўшма лойиҳаларни амалга ошириш масалалари муҳокама қилинди.

Томонлар Ўзбекистон ва Покистон ҳудудларида мазкур мамлакатларнинг бой гастрономик меросини акс эттирувчи ресторанлар очишга келишиб олди. Ушбу ресторанларда нафақат миллий таомлар, балки икки халқ маданияти, урф-одатлари ва меҳмондўстлик анъаналари намойиш этилади.

Учрашув давомида, шунингдек, қўшма лойиҳаларни амалга оширишнинг ташкилий жиҳатлари – инвесторлар билан ҳамкорлик, лойиҳа жойини танлаш, малакали кадрлар тайёрлаш, сифат стандартлари, логистика ва бошқа амалиёт масалалари ҳам муҳокама қилинди.

Мазкур ташаббус Ўзбекистон ва Покистон ўртасидаги дўстона муносабатларни янада мустаҳкамлаш, маданий дипломатияни ривожлантириш ҳамда икки томонлама савдо-иқтисодий ҳамкорликни кенгайтиришга хизмат қилиши кутилмоқда.

#Ўзбекистон #Покистон #ресторан