"Навоийуран" корхонасида ESG тамойиллари асосида янги стандартлар жорий этилди

“Навоийуран” ахборот хизматига кўра, корхонада халқаро ISO 37001 “Коррупцияга қарши курашиш менежменти” ва ISO 37301 “Комплаенс менежменти” стандартлари жорий этилди. Бу стандартлар корхонада коррупциявий хавфларни аниқлаш, олдини олиш ва бартараф этишга қаратилган самарали бошқарув тизимининг мавжудлигини ҳамда комплаенс-менежмент соҳасидаги жаҳон андозаларига мос иш юритилишини кўрсатади.

5 июн куни "CERT International" халқаро сертификатлаш ташкилотининг бош аудитори Риад Ибрагимов мазкур стандартлар бўйича сертификатларни “Навоийуран” ДК Бош директори Джамал Файзуллаевга тантанали равишда топширди. Ушбу сертификатлар корхонанинг ESG (Environmental, Social, Governance) тамойилларига қатъий амал қилишини ва жаҳон миқёсидаги талабларга мос иш юритишини яна бир бор тасдиқлади.

Эслатиб ўтиш жоизки, “Навоийуран” давлат корхонаси бугунга қадар халқаро ISO стандартларининг бешта тури бўйича сертификатларга эга. Уларнинг орасида ISO 9001 (Сифат менежменти), ISO 14001 (Экологик менежменти), ISO 45001 (Меҳнатни муҳофазаси ва техника хавфсизлигини таъминлаш менежменти), ISO 27001 (Ахборот хавфсизлиги менежменти) ва ISO 50001 (Энергетика менежменти) стандартлари мавжуд.

Халқаро ISO стандартлари сонининг 7 тага етказилиши "Навоийуран" ДКнинг корпоратив бошқарув, ижтимоий масъулият ва экологик барқарорлик соҳаларидаги ислоҳотларга содиқ эканини ва ESG рейтингини яхшилаш йўлидаги муҳим қадамлардан бири бўлди.

5 март куни бўлиб ўтган Коррупцияга қарши курашиш миллий кенгаши йиғилишида белгилаб берилган топшириқ ва вазифалар асосида "Навоийуран" давлат корхонаси коррупцияга қарши қатъий кураш ва амалиётда тизимли ислоҳотлар олиб боришни давом эттиради.