Қўшмачи “проводник”: поезд купеси ишратхонага айлантирилгани аниқланди

Поезд купесида қўшмачилик қилган вагон кузатувчиси жиноий жазога тортилди. Kun.uz суд ҳукми билан танишди.

Суд ҳужжатида келтирилишича, 1985 йилда Пайариқ туманида туғилган Дилшод Ҳамдамов 2019 йил май ойидан “Ўзтемирйўлйўловчи” АЖ маҳаллий йўналишларда йўловчиларга хизмат кўрсатиш филиали вагонлар хизматчиси лавозимида ишлаб келган.

Дилшод Ҳамдамов 2025 йил 21 феврал куни 071-рақамли “Олот-Тошкент” йўналишида ҳаракатланувчи йўловчи поезднинг 7-вагонида кузатувчи бўлган. У шу куни “Қоракўл” темирйўл вокзалидан чиққан йўловчи Б.Ў.га таниши Г.Ў. билан жинсий алоқа қилиб кетиши учун 300 минг сўм эвазига 7-вагоннинг 2-купесида шароит яратиб берган. Аслида бу йўловчиларнинг чиптаси поезднинг 11-вагонига олинган бўлган.

“Проводник”нинг поездда қўшмачилик қилгани Навоий вилояти Транспортда хавфсизликни таъминлаш бошқармаси жиноят қидирув гуруҳи ходимлари томонидан аниқланган. Тадбирда ишлатилган 300 минг сўм пул ашёвий далил сифатида расмийлаштириб олинган.

Дилшод Ҳамдамов судда айбига тўлиқ иқрорлик билдирган.

“2025 йил 21 феврал куни “Олот-Тошкент” йўналишидаги 071-рақамли йўловчи поездининг 7-вагонида кузатувчилик қилдим. Шу куни соат 19:00 ларда “Олот” бекатидан йўлга чиқиб, соат 20:00 ларда “Қоракўл” темирйўл бекатига етиб келдик. Йўловчиларни вагонга чиқариш вақтида ёнимга Б.Ў. бир аёл киши билан келди. Уларнинг чиптаси 11-вагоннинг 48- ва 50-жойлари эди. Б.Ў. ва ёнидаги аёлни 7-вагоннинг 5- ёки 6-купе вагонига киритиб, шу ерда ўтириб туришларини айтдим. Ўзим СВ типли хоналарни текшириб, 3 та бўш СВ типли хона Самарқандгача бўш эканини аниқладим. Эркак ва аёлни 3-СВ хонага жойлаштирдим. Бироз вақт ўтиб, аёл келди ва СВ хонанинг эшиги ёпилмаслигини айтиб, бошқа хона қилиб беришни сўради.

Кейин уларга 2-купега киришларини айтдим. Киришганидан сўнг уларга купеда дам олиб кетишлари учун шароит яратиб бердим. Бунинг эвазига эркакдан 300 минг сўм олдим. Эркак менга купеда ҳамроҳ аёли билан жинсий алоқа қилиб кетишини билдирди. Уларни ҳеч ким безовта қилмаслигини, эшикни ичкаридан қулфлаб олишни айтиб, янги чойшаб ҳамда ювинишлари учун илиқ сув келтириб бердим”, деган Дилшод Ҳамдамов ўз кўрсатмасида.

Поезд Қизилтепа бекатига келиб тўхтаган. Дилшод Ҳамдамов йўловчиларни чиқараётганида ИИБ ходимлари унинг ёнига келиб, 2-купени очишни сўраган. Шу тариқа у тезкор тадбирда ашёвий далиллар билан ушланган.

Дилшод Ҳамдамов ушбу эркакка олдин ҳам “хизмат кўрсатган” бўлган. Буни судда гувоҳ сифатида сўралган Б.Ў. тасдиқлаган.

“2024 йил сентябр ойи ўрталарида Н. исмли танишим билан иш юзасидан Бухоро вилоятининг Қоракўл туманига бордим. Қайтишда Н. билан поездда Тошкент шаҳрига кетишни режалаштириб, чипта сотиб олдик. Чипталаримиз бўйича ўрнимиз турли вагонларда эди.

Поезд келганидан сўнг вагон олдида турган Дилшод Ҳамдамов ёнига бориб, шеригимни ёнимда олиб кетмоқчи эканимни билдирдим. У бунинг иложи борлигини, фақат қўшимча тўлов қилишим кераклигини айтди. У шеригим Нигорани ўзим ўтирган купега жойлаштириб бериш эвазига 200 минг сўм сўради.

Дилшод Ҳамдамовга шеригим билан алоҳида хонада кетишим кераклигини, у билан жинсий алоқа қилиб кетмоқчи эканимни айтганимда у яна 200 минг сўм берсам ўзининг хонасини бўшатиб беришини билдирди.

Вагон кузатувчиси ўзининг хизмат хонасида танишим билан жинсий алоқа қилишим учун шароит яратиб берди. Кейин биз купега кириб, эшикни ичкаридан қулфлаб олдик. Самарқанд шаҳригача купеда танишим билан жинсий алоқа қилиб кетдим”, деган эркак судда.

Шундан сўнг эркак йўловчи вагонларда бундай ахлоққа зид ҳаракатларга чек қўйиш мақсадида 2025 йил 21 феврал куни Навоий вилояти Транспортда хавфсизликни таъминлаш бошқармаси бошлиғи номига ариза билан мурожаат қилган. Унинг аризаси асосида тезкор тадбир ўтказилган.

Суд ҳукми билан Дилшод Ҳамдамов Жиноят кодексининг 131-моддаси 1-қисмида назарда тутилган жиноятни (ғаразли ёки бошқа паст ниятларда қўшмачилик қилиш) содир қилганликда айбдор деб топилган. Унга ойлик иш ҳақининг 20 фоизини давлат даромади ҳисобига ушлаб қолган ҳолда 2 йил ахлоқ тузатиш ишлари жазоси тайинланган. Шунингдек, Дилшод Ҳамдамов 1,5 йил “Ўзбекистон темирйўллари” АЖ тизимидаги корхона ва ташкилотларда мансабдорлик ва моддий жавобгарлик лавозимларида ишлаш ҳуқуқидан ҳам маҳрум қилинган.