Германия Эроннинг Қатардаги АҚШ базасига ҳужум қилиш режалари ҳақида билмаган

Берлин Эроннинг Қатардаги АҚШнинг Ал Удейд базасига ҳужум қилиш нияти ҳақида олдиндан билмаган. Бу ҳақда 23 июн, душанба оқшомида Германия ташқи ишлар вазири Йоханн Вадефул Германиянинг ARD жамоат телеканалининг Tagesthemen янгиликлар дастурида маълум қилди.

«Биз Қатар ўз ҳаво ҳудудини ёпганини эшитдик, шунинг учун буни (АҚШнинг Қатардаги Ал-Удейд базасига ҳужум) кутиш мумкин эди», деб тан олди немис дипломатияси раҳбари.

Эроннинг Қатардаги АҚШ базасига ҳужумини қоралаган Вадефулга кўра, Теҳроннинг бу қадами 22 июнга ўтар кечаси Эрон ядро иншоотларига ҳужум қилган АҚШ ҳаракатларига «жавоб» бўлди. Шу билан бирга, вазир АҚШ президенти Доналд Трамп, унинг фикрича, Эрон ҳужумига шу қадар эҳтиёткорлик билан жавоб берганидан хурсанд бўлган: «Шундай қилиб, кейинги эскалация юз бермайдигандек туюляпти».

Шу билан бирга, Германия ташқи ишлар вазирлиги раҳбари ҳозирда АҚШ ва Эроннинг музокара столига ўтириши учун «жуда катта имконият бор»лигини айтди.

АҚШнинг Эрон ядро иншоотларига зарбаларига тўхталиб, Йоханн Вадефул халқаро ҳуқуқ нуқтайи назаридан уларга якуний баҳо беришдан бош тортди ва бу масала бўйича АҚШ ва Исроилда мавжуд бўлган барча маълумотларга эга эмаслигини асослаб берди. Аввалроқ Франция президенти Эммануэл Макрон ушбу операцияни амалга ошириш учун зарур ҳуқуқий асос йўқлигини айтган эди, деб эслатади dpa.

Лондон Қироллик коллежининг мудофаа масалалари бўйича мутахассиси Марина Мирон DW нашрига берган интервюсида Эроннинг Қатардаги АҚШ ҳарбий базасига ҳужумини «намойишкорона» деб атади, чунки унинг фикрича, Ал-Удейд базаси Американинг Яқин Шарқдаги таъсир доирасининг дастагидир.

Шу билан бирга, эксперт Эрон ўзининг қурол-яроғ омборлари йўқ қилингани ҳақидаги хабарларга қарамай, қисқа ва ўрта масофага учувчи ракеталар ёрдамида ушбу операцияни қандай тезликда амалга ошира олганига эътибор қаратди.

У Эрон ўз ҳудудида жойлашган АҚШ базасига ҳужум қилгандан кейин Қатарнинг Эрондаги нишонларга зарба бериш эҳтимолини паст деб баҳолади.