Microsoftʼнинг янги сунъий интеллекти ташхисларни шифокорлардан тўрт марта аниқроқ қўймоқда

Microsoft сунъий интеллект асосида ишловчи янги диагностика тизимини тақдим этди — у ташхисни шифокорлар жамоасидан кўра, тўрт баравар аниқроқ қўя олади, деб ёзмоқда Wired. Бундан ташқари, у тиббий текширувлар харажатини 20 фоизга қисқартиради.

Microsoftʼнинг сунъий интеллект бўйича бўлинмасини бош директори Мустафо Сулаймоннинг сўзларига кўра, ушбу янгилик «тиббий интеллект сари ҳақиқий қадам» ҳисобланади. MAI Diagnostic Orchestrator номини олган тизим ChatGPT, Gemini, Claude, LLaMA ва Grok каби етакчи тил моделлари қувватини ўзида бирлаштиради ҳамда бир нечта эксперт ҳамкорлиги тамойили асосида ишлайди.

Тадқиқот New England Journal of Medicine журналида чоп этилган 304 та клиник ҳолат асосида олиб борилган. Тизим шифокор ҳаракатларини тақлид қилган, яъни касаллик аломатлари устида таҳлилларни амалга оширган, тестлар тайинлаган ва ташхис қўйган. Тажрибада мазкур тизимнинг аниқлиги 80 фоизни ташкил этган, шифокорларда эса ушбу кўрсаткич — атиги 20 фоиз. Шунингдек, тизим арзонроқ, бироқ самаралироқ бўлган диагностика усулларини танлаган.

Лойиҳага Googleʼнинг собиқ ходимлари раҳбарлик қилмоқда — Microsoft уларни ўзига жалб қилиб олган. Бу техногигантлар ўрасида сунъий интеллект соҳасида рақобат кучайганидан далолат беради. Microsoft вице-президенти Доминик Кингнинг сўзларига кўра, кейинги қарам тизимнинг реал клиник шароитларда самарадорлигини текшириш бўлади.

Аммо экспертлар натижаларни эҳтиёткорлик билан талқин қилиш кераклигидан огоҳлантирмоқда. Хусусан, тадқиқотда шифокорлар одатда ёрдам воситаларда фойдаланиши инобатга олинмаган. Шунингдек, тизим беморларнинг шахсий хусусиятларини — масалан, тиббий муолажаларга тоқатлилиги ёки керакли ускуналарнинг мавжудлиги каби омилларни қандай инобатга олади, деган масала ҳам ноаниқлигича қолмоқда.

Айни вақтда компания тизимни тижоратлаштирадими ёки йўқ — бу номаълум, аммо у Bing ёки бошқа тиббий сервислар билан интеграция қилиниши мумкин. Microsoftʼнинг ҳисоблашича, бундай ишланмалар тиббиётга ажратиладиган харажатларни сезиларли даражада қисқартиради.