Ўзбекистонда қурилиш ойналарини қайта ишлаш учун утилизация йиғими жорий этилмоқда

Техник тартибга солиш агентлигидан чиққан бу таклифни юздан ортиқ депутат қўллаб-қувватлаши натижасида, тегишли қонун биринчи ўқишда қабул қилинди.

Фото: Қонунчилик палатаси матбуот хизмати

Ўзбекистонда қурилиш ойнасидан фойдаланиш натижасида юзага келадиган чиқиндиларни қайта ишлаш учун утилизация йиғими жорий этилмоқда. Техник жиҳатдан тартибга солиш агентлиги ишлаб чиққан қонун лойиҳасини 1 июл куни Қонунчилик палатаси депутатлари биринчи ўқишда қабул қилди.

Парламентда сўзга чиққан агентлик директори Акмал Жуманазаровнинг айтишича, Ўзбекистонда шиша чиқиндилари ҳосил бўлишининг йиллик прогнози 408 минг тоннани ташкил этади. 2024 йилда шундан атиги 9 фоизи, яъни 37 минг тоннаси қайта ишланган.

Жуманазаровга кўра, қайта ишланмаётган шиша чиқиндилари атроф-муҳитга салбий таъсир кўрсатмоқда.

“Қонун лойиҳаси билан қурилиш ойнасидан фойдаланиш натижасида юзага келадиган чиқиндиларни қайта ишлаш инфратузилмасини яратиш, қайта ишлашга сарфланган харажатларни қоплаш учун утилизация йиғими жорий этилмоқда”, – деди Техник тартибга солиш агентлиги раҳбари.

Қонун лойиҳасини тайёрлашда Россия Федерацияси, Беларус ва Қирғизистон тажрибаси ўрганилган. Лойиҳа бешта вазирлик-идоралар билан келишилган, Адлия вазирлигидан ҳуқуқий экспертизадан ўтказилган.

105 нафар депутатнинг ёқлаб овоз бериши билан, қонун лойиҳаси биринчи ўқишда қабул қилинди. 4 депутат қарши чиқди, 5 нафари бетараф қолди, қуйи палатанинг 14 аъзоси овоз бермади.

#Қонунчилик палатаси #солиқ #қурилиш #утилизация йиғими #Акмал Жуманазаров #қурилиш ойнаси