Андижонда профилактика инспектори пичоқланди, Қўйлиқ йўлида мегатирбандлик юзага келди — маҳаллий дайжест

Шавкат Мирзиёев давлат ташрифи билан Бокуга борди. Қўйлиқда мега тирбандлик юзага келди. Фарғонадаги портлашда тўрт жигарини йўқотган аёлга товон пули берилмаяпти. Андижонда эркак профилактика инспекторини пичоқлаб, қочиб кетди. Кун давомида Kun.uz ёритган шу ва бошқа муҳим маҳаллий янгиликлар билан таништирамиз.

{Yii::t(}

Ўтказиб юбориш 6s

Ўтказиб юбориш

Шавкат Мирзиёев Бокуга борди

Ўзбекистон президенти Шавкат Мирзиёев Озарбойжон президенти Илҳом Алиев таклифига биноан давлат ташрифи билан Боку шаҳрига борди.

Пойтахтдаги Ҳайдар Алиев номидаги аэропортда давлат раҳбарини Озарбойжон бош вазирининг биринчи ўринбосари Яқуб Аюбов ва бошқа расмий шахслар кутиб олди.

Шундан сўнг, «Загулба» қароргоҳида Шавкат Мирзиёевни расмий кутиб олиш маросими бўлди.

Қароргоҳ олдидаги майдонда икки давлат байроқлари кўтарилди, фахрий қоровул саф тортди.

Олий мартабали меҳмонни Озарбойжон президенти Илҳом Алиев самимий кутиб олди. Давлат мадҳиялари янгради. Ҳарбий оркестр садолари остида фахрий қоровул давлат раҳбарлари олдидан саф тортиб ўтди.

Биргаликда суратга тушишдан сўнг Ўзбекистон ва Озарбойжон президентларининг тор доирадаги учрашуви бўлиб ўтди.

Андижонда профилактика инспектори пичоқланди

Андижон вилояти Хўжаобод туманида профилактика инспектори хизмат вазифасини бажараётган вақтда қотиллик қурбонига айланди.

Ички ишлар вазирлигининг маълум қилишича, 1 июл куни соат 20:50 ларда туманнинг Юксалиш маҳалласидаги хонадонда жанжал бўлаётгани ҳақида 102 қисқа рақамига келиб тушган хабар бўйича ҳудуд профилактика инспектори катта лейтенант Абдурасул Абдувалиев, маҳалла раиси билан бирга воқеа жойига етиб борган.

Аниқланишича, 1960 йилда туғилган фуқаро Юнусали Холбозоров маст ҳолда ўз оила аъзоларига хўжалик пичоғи билан таҳдид солаётган бўлган. Ҳужумчини зарарсизлантириш жараёнида Холбозоров қўлидаги пичоқ билан катта лейтенант Абдувалиевнинг кўкрак қисмига зарба бериб, оғир тан жароҳати етказган.

Инспектор олган жароҳати натижасида кўрсатилган ёрдамга қарамасдан шифохонага олиб кетилаётган вақтида вафот этган.

Ҳолат юзасидан Жиноят кодексининг «хизмат бурчини бажараётган шахсни қасддан ўлдириш» моддаси билан жиноят иши қўзғатилган.

Гумондор Холбозоров воқеа жойидан яширинган. Ҳозирда уни ушлаш бўйича тезкор-қидирув тадбирлари амалга оширилмоқда.

Роҳат айланма йўлида автомобил ҳаракати вақтинча ёпилади

2025 йил 2 июл куни Тошкент шаҳар Яшнобод туманидаги Роҳат айланма йўлида автомобил ҳаракати вақтинча ёпилади.

Тошкент шаҳар транспорт ва йўл-транспорт инфратузилмасини ривожлантириш бош бошқармаси хабарига кўра, шу сабабли ушбу ҳудуд орқали ҳаракатланувчи 26-, 54-, 110-, 119-, 128-, 174-сонли автобус йўналишлари ҳаракати ўзгартирилади.

Таъкидланишича, йўл таъмирлаш ишлари давомида транспорт ҳаракати чекланиши ва тирбандликлар юзага келиши мумкин. Зарурат туғилганда йўналишларга қўшимча ўзгартиришлар киритилади.

Шунингдек, бугун Қўйлиқ бозори яқинидаги чорраҳа ва кўприкда катта тирбандликлар юзага келди.

Тонгдан бошланган тирбандликлар Food City’дан Қўйлиқ бозори томонга, ундан эса Мухтор Ашрафий кўчасига — халқ тилида айтадиган бўлсак, «Рисовий» бозоргача чўзилди.

Kun.uz’га мурожаат қилган фуқароларга кўра, улар бир неча соат ушбу тирбандликда қолиб кетган.

Фарғонадаги портлашда тўрт жигарини йўқотган аёл товон пулини ололмаяпти

2024 йил 17 декабр куни Фарғона шаҳри Аҳмад Яссавий кўчасида жойлашган бензин ва пропан қуйиш шохобчасида портлаш рўй бериб, бир неча фуқаро ҳалок бўлган эди. Воқеада айбдор деб топилган тўрт кишига нисбатан суд ҳукми чиқарилган. Асосий айбдор деб кўрилган, ўзини шохобчанинг раҳбари деб таништирган Мансур Маткаримов 5 йилга озодликдан маҳрум қилинган.

Мудҳиш ҳодисада Жамила Орипова бир қизи ва 3 набирасидан айрилган. 1988 йилда туғилган қизи Севара Юсупова, унинг 4 ва 2 ёшли фарзандлари, шунингдек, Орипованинг катта қизининг 18 ёшли фарзанди фожиа қурбони бўлган.

Аёлнинг сўзларига кўра, ҳокимлик вакиллари томонида уларга 17 миллион, қуда томонга эса 30 миллион сўм пул берилган. Шу билан бошқа ёрдам кўрсатилмаган. «Пенсионерман, турмуш ўртоғим ҳам пенсионер. Ҳеч қанча пенсия олмаймиз. Заправка эгалари Ҳайитга харажат ташлаб кетишди, бу Ҳайитга ҳам ташлаб кетишди», — дейди Орипова.

Жамила Орипованинг айтишича, заправканинг эгаси Азизхўжа Мавлонов унинг куёвини чақириб, одам бошига 25 минг АҚШ долларидан бераман деб ваъда қилган. Лекин 5 минг доллар бериб, шу билан йўқ бўлиб кетган.

«Заправканинг ҳақиқий эгалари Мавлоновлар судда умуман қатнашмади. Уларнинг ишчилари қамалиб кетди. Суддан кўнглим тўлмади. Шохобчанинг ҳақиқий эгалари ўзлари қатнашсин судда», – дейди Жамила Орипова.

Эслатиб ўтамиз, суд ҳукми билан Мансур Маткаримовдан 4 нафар қурбоннинг қонуний вакилларига 310 миллион сўмдан жами 1 миллиард 240 миллион сўм маънавий зарар ундириш белгиланган.