Босния серблар етакчиси Додикни ҳибсга олишга берилган ордерни бекор қилди

Босния ва Ҳерцеговинада суд тизими босниялик серблар етакчиси Милорад Додикни ҳибсга олиш ордерини бекор қилди. «Додик Бош прокуратурага келди ва у ерда кўрсатма берди. Шу муносабат билан уни ҳибсга олиш учун берилган ордер бекор қилинди», — дейилади мамлакат Бош прокуратураси ва Давлат судининг 4 июл, жума куни қўшма баёнотида.

66 ёшли серблар етакчиси вақтинчалик озодликка чиқарилган. Суд қарорига кўра, Додик ҳокимият органларига мунтазам равишда ҳисобот бериши керак. Акс ҳолда, ҳибсга олиш учун янги ордер чиқарилади.

Милорад Додик ўзига нисбатан қабул қилинган қарорни изоҳлар экан: «Бу мен учун муҳим бир лаҳза, лекин бу ишдан ёмон ниятда бўлган ва вазиятни беқарорлаштириш, Боснияда муаммоларни авж олдириш учун ишлатмоқчи бўлганлар учун ҳам муҳим. Мен ўзимни ғалаба қозонган сифатида ҳис қилмаяпман. Бу ишдан тўйиб кетганман», деди.

Босния ва Ҳерцеговина Давлат суди март ойи ўрталарида Додикни бир томонлама тартибда Босния ва Ҳерцеговина таркибидаги Серб Республикаси ҳудудидаги Босния адлия ва полиция органларининг ваколатлари тугатилганини эълон қилганидан кейин уни ҳибсга олишга халқаро ордер берган эди.