Трампдан янги дедлайн – 50 кун. Бу нима дегани?

Азизлар, биз кеча Доналд Трамп Россия – Украина уруши бўйича «катта чиқиш» қилиши, унда муҳим гаплар янграши мумкинлиги ҳақида ролик эълон қилгандик. Видео охирида Трамп Украинага каска ва аптечка бериш билан чекланса ҳам ажабланманг, дегандик. Трампнинг «ғазабнок» чиқиши бундан ҳам ошиб тушди.

Кутиб олинг, мистер президентдан янги дедлайн: Трамп Россияга 50 кун муҳлат берди. Аввал бир кун, кейин уч кун, кейин уч ҳафта, энди 50 кун. Жаноб Трамп худди келишилган футбол ўйинидаги бир жамоа ғалаба голини урушини кутаётган ҳакамга ўхшаб кетяпти. Кечаги видеомизда айтганимиздек, бу ҳамон ўша – Хелсинки саммитида «Америка разведкасига эмас, Путинга ишонаман», деган Трамп экан.

{Yii::t(}

Ўтказиб юбориш 6s

Ўтказиб юбориш

Россияга 50 кун муҳлат

Доналд Трамп кутилганидек алоҳида баёнот бермади, шунчаки НАТО бош котиби Рютте билан учрашувда Россияга нисбатан гўёки «танқидий фикрлар» билдирди. Трамп ҳатто баёнот матнини ҳам тайёрламаганди, шу сабаб рақамлар, муддатлар бўйича чалкашиб кетди, жуда кўп ноаниқ гаплар айтди.

Баёнотдаги энг муҳим гап – Россияга 50 кун муддат берилгани бўлди. Трампнинг сўзларига кўра, 50 кун ичида Россия Украина билан тинчлик келишувига эришмаса, Москвага қарши кескин божлар жорий қилинади. Америка матбуотида Путин Трампга 60 кундан кейин Украина бўйлаб янги ҳужум бошлашини айтгани ҳақида хабар чиққанди. Трамп Россияга 50 кун вақт берганига қараганда, уларнинг суҳбатида чиндан шу масала кўтарилган.

Трамп сўзи давомида Россияга қарши чекловлар деганда иккиламчи санкциялар назарда тутилганини айтди. Яъни, Россия маҳсулотини сотиб олган давлат компаниялари Америкага олиб кирадиган маҳсулоти учун 100 фоизгача бож тўлаши мумкин.

17 та «Patriot»

Трампнинг айтишича, Украина 17 та «Patriot» ҳаво ҳужумидан мудофаа тизимлари олади. Трампнинг гапларидан келиб чиқадики, НАТО давлатлари ўзларида мавжуд 17 та тизимни Украинага юборади. Эвазига АҚШ ўша давлатларга янги «Patriot»лар сотади. Яъни, бу ҳеч қанақасига АҚШнинг Украинага ҳарбий ёрдами бўлмайди. Шунчаки Вашингтон ўзида ишлаб чиқарилган бу қурол Украинага юборилишига қаршилик қилмай, ўртада мўмайгина пул ишлаб олади.

Трампнинг баёнотидаги энг қизиқ гап унинг хотини билан суҳбати ҳақида бўлди. АҚШ президентининг гапларидан биринчи хоним Меланя Трамп Россияга нисбатан танқидий қарашда эканини сезиш мумкин. «Уйга бориб биринчи хонимга «Мен Владимир билан ажойиб суҳбат ўтказдим, дейман. Биринчи хоним эса «Чинданми? Улар ҳозиргина яна бир шаҳарни бомбалашди», дейди. Мен Путинни қотил дея олмайман, лекин у раҳмсиз йигит, буни вақт кўрсатди. У кўпларни алдади, Клинтонни, Бушни, Обамани, Байденни, мени эса алдолмайди. Баъазан бунақа қуруқ гаплар наф қилмай, ҳаракат қилиш керак бўлади», деди Трамп.

Россия учун яхши чиқиш

Америка нашрларида Киевда Трампнинг баёнотини хавотир билан кутишаётгани ҳақида ёзишганди. Улар бир нарсани билишган экан, чиндан Трампнинг баёноти Россия учун айни муддао бўлди. Чунки унда кутилганидек Киевга ҳужум қуроллари берилиши, умуман ҳеч қандай ҳарбий ёрдам ҳақида эълон қилинмади. 50 кунлик муддат ҳам жуда қулай, бу стратегик манёвр қилиш учун етарли вақт.

Россияда ҳам Трамп бу қадар юмшоқ чиқиш қилишини кутишмаганди. Трампнинг баёнотидан 20 дақиқа ўтиб Москва биржаси индекси 3 фоизга кўтарилди. Бу баҳордан буён кузатилган энг юқори ўсиш бўлди. Айниқса «Газпром», «Роснефт» ва «Лукойл» каби нефтга боғлиқ компаниялар акциялари энг кўп қимматлади. Чунки бозор Трамп Россия нефтига қарши санкция эълон қилишини кутганди.

Ана шунақа гаплар, азизлар. Жаноб Трамп яна бизни ажаблантира олмади. Республикачи ҳамон дедлайн улашишда давом этмоқда. Нима деб ўйлайсиз, 50 кунлик муҳлат тугагач, Трампнинг кейинги дедлайни қанча муддатга бўларкин?

Ўткир Жалолхонов тайёрлади
Тасвирчи ва монтаж устаси – Фахриддин Ҳотамов