Ҳоқон Фидан: Исроил тинчликни истамайди, Исроил барқарорликни хоҳламайди

Бирлашган Миллатлар Ташкилоти Хавфсизлик кенгаши нафақат Ғазо халқини, балки инсоний қадр-қимматни ҳам эътиборсиз қолдирди — Туркия ташқи ишлар вазири.

Фото: AP

Туркия ташқи ишлар вазири Ҳоқон Фидан БМТ Хавфсизлик кенгашининг Ғазодаги гуманитар вазият муҳокама қилинган фавқулодда йиғилишида нутқ сўзлади.

Фидан ўз нутқида: «Исроил тинчликни истамайди. Исроил барқарорликни хоҳламайди» деди.

Исроилнинг Фаластин халқига қарши геноцидининг айни дамда ҳам узлуксиз давом этаётганига эътибор қаратган Фидан, Ғазо секторида 2 миллиондан ортиқ аҳолининг таърифлаб бўлмас азоб-уқубатлар, оммавий кўчирилиш ва кенг кўламли вайронагарчиликларга дучор бўлаётганини қайд этди.

Туркия ташқи ишлар вазири ҳар куни инсонпарварлик ёрдамлари атайлаб тўсиб қўйилаётганини, ёрдам тарқатиш пунктларида тинч аҳоли озиқ-овқат ва сув олишга уринаётганда ўлдирилаётганини эслатди.

Ҳоқон Фидан ўз чиқишини қуйидаги сўзлар билан давом эттирди: «Очликдан уруш қуроли сифатида фойдаланилмоқда. Исроил халқаро гуманитар ҳуқуқнинг барча тамойилларини бузмоқда. Бу ҳақда очиқ гапирайлик. Тўғрисини айтайлик. 80 йилдан кейин дунё яна бир бор концлагерлар барпо этилганига гувоҳ бўлмоқда. Бутун бир халққа қарши қирғин кампанияси олиб борилмоқда».

Исроил уруш машинасининг оилалари учун сув олишга ҳаракат қилаётган болаларга ёки фарзандлари учун озиқ-овқат излаётган оналарга ҳужум қилишда давом этганига эътибор қаратган Фидан: «Бу нафрат билан озиқланадиган машина. Бу жазосизлик билан озиқланадиган машина ва баъзи доираларнинг сўзсиз ёрдами билан озиқланадиган машина», деди.

Унинг сўзларига кўра, бу баъзи одамлар ҳаддан ташқари азоб-уқубатларга қарамай, содир бўлаётган воқеаларга эътибор бермасликни афзал кўрганлиги сабабли юз берди. «Бу давом этиши мумкин эмас», деди у.

#Туркия #Исроил #Ҳоқон Фидан